HUMAN siya hinganli ni Justice Secretary Vitaliano Aguirre II nga drug protector, ang “kanhi laos nga pulitiko” nagpataka na pod og hingalan og laing tawo nga drug protector. Ang gibasihan ni Aguirre sa paghingalan kaniya nga drug protector mao ang affidavit ni Reynaldo “Jumbo” Diaz, ig-agaw ug bata-bata sa napatay nga drug lord nga si Jeffrey “Jaguar” Diaz. Matod pa ni Jumbo nga ang “kanhi laos nga pulitiko” nakadawat og mokabat ngadto sa P7 milyones gikan ni Jaguar panahon niadtong miaging eleksiyon.
Apan niadtong miaging semana, ang “kanhi laos nga pulitiko” mihingalan usab siya sa iyang kaatbang nga si kanhi mayor Mike Rama nga maoy nakadawat og dakong kantidad gikan kang Jaguar. Matod pa niya nga base sa iyang nahibaw-an, nakadawat si Mike ug P10 milyones gikan ni Jaguar. Lain niyang gihinganlan nga drug protector mao si National Police Commission (Napolcom 7) Regional Director Homer Cabaral. Kay matod pa niya wala daw makasumpo si Cabaral kang Jaguar nga unta silingan man sila diha sa Duljo Fatima.
Unya karon si Presidential Assistant for the Visayas Michael Dino ang gipasanginlan nga maoy naggalgal ni Aguirre nga hinganlan siya nga drug protector kay sila si Dino ug Aguirre mga suod nga higala bisan niadtong wala pa mahimong secretary si Aguirre. Naunsa naman intawon ni siya uy?! Mora naman kini siya og irong boang nga magpataka na lang og panaghot.
Mas bug-at pa ning pasangil ni Aguirre batok niya kay adunay affidavit nga gibasihan. Ang iyang akusasyon batok ni Cabaral way igong basihanan. Aw, dili na kita angayang matingala kon sa sunod ang iya na usab nga mga kaatbang sa pulitika ug kontra maoy iyang pang-akusahan.
Busa andam-andam na lang mo, Vice Mayor Edgardo Labella, Konsehal Joel Garganera, Raymond Garcia, Kapitan Ramil Ayuman. Posible man gani nga iapil ko kay iya na god kong gihinganlan nga ok-ok uban ni Dino. Miingon god siya nga dili siya maoy nagpapatay kang Kapitan Imok Rupinta kay buhi pa kuno mi ni Garganera. (bobbygnalzaro@gmail.com)