ANAA na dugo sa pamilya Soco sa Brgy. Labogon, dakbayan sa Mandaue ang panerbisyo sa katawhan.
Kini maoy rason nganong gidawat ni Marvin Soco ang dakong hagit sa dihang gitanyag ni Mayor Luigi Quisumbing kaniya ang posisyon isip manager sa North Reclamation Area sa dakbayan.
Gawas sa pagka-manager, si Soco mao sab ang gihimong assistant city administrator sa dakbayan sukad sa milabayng buwan.
Sa wa pa nisud sa politika si Soco niadto, nagtrabaho siya isip banker ug konektado siya sa mga pribadong development bank sa dakbayan sud sa 11 ka tuig.
Human siya nitapos sa iyang Masters Degree sa Business Administration, nagtudlo sab siyag part-time sa usa ka pribadong tunghaan sa Mandaue.
Sa pakighinabi sa Superbalita Cebu, si Soco niingon nga naa sa ilang dugo ang politika ug panerbisyo sa katawhan tungod kay kanhi konsehal sa barangay iyang amahan sud sa 12 ka tuig ug kanhi numero uno nga konsehal sab iyang igsuon.
Kamaguwangan siya sa upat ka magsuon, laing duha niya ka mga igsuon ug usa ka bayaw ang nagsilbi isip barangay kapitan ug konsehal.
Nagsugod ang iyang karera sa politika niadtong 2007 isip konsehal sa Labogon. Sa pagkakaron, naglingkod siya isip bise presidente sa Barangay Councilors League of the Philippines, Mandaue City Chapter.
Giklaro ni Soco nga human sa iyang pagsud sa politika sa katuigan, di na siya modagan pa og bisan unsang posisyon.
“I know I can still help my constituents by way of being in the City but in a bigger scope,” matod niya sa Superbalita Cebu.
Gi-unsa pagpili
Si Soco nagkanayon nga usa ka higayon, atol sa kaswal nilang panagtabi ni Quisumbing, nipadayag siya sa iyang pagkadesido nga motabang sa dakbayan sanglit mahuman naman iyang ikatulong termino sa barangay.
“I feel it would be best for me to give back to my City by way of sharing my expertise and knowledge in corporate management and finance,” dugang pa niya.
Paambit ni Soco nga ang dakong hagit sa pagmaneho sa dagan sa NRA maoy nakapadani niya nga modawat sa posisyon.
Malaumon siya nga masolusyunan ra unya ang mga problema nga iyang maagian sa umaabot pinaagi sa tabang ug suporta sa iyang mga kauban sa city hall.
Trabaho ni Soco isip manager nga motan-aw sa kinatibuk-ang dagan sa NRA ug motubag sa mga panginahanglan ug mga problema nga masinati unya sa mga dagkong establisemento nga nahimutang dinhi, sumala ni Quisumbing niadto.
Gihimo sa mayor ang posisyon tungod kay problema niini ang pagpatuman sa kahapsay ug kalinaw, seguridad, koleksyon sa basura ug uban pa. Way barangay nga direktang makatubag sa maong mga problema tungod kay anaa sa lima ka nagkadaiyang barangay ang nag-ilog sa hurisdikyon niini.
Giangkon ni Soco nga di lalim nga maghupot og duha ka sensitibong posisyon apan andam niya kining atubangon uban ang mga supportadong labaw ug kauban sa buhat.
“Multi-tasking is not new to me since we use to do this a lot when I was in the bank and of course, proper time management is the key to all of this,” ni Soco.
Isip manager sa NRA, buot ni Soco nga mabatyagan sa mga nanag-iya og establisamento sa NRA ug future investors nga andam mohangop ang kagamhanan sa dakbayan sa ilang mga panginahanglan.
“To have a mutual and beneficial business relationship between the City of Mandaue and our locators and the end of the day, you will see happy and satisfied faces from our businessmen and future investors of the City,” padayag ni Soco.