BUOT sa Mandaue City Disaster Risk Reduction and Management Office (CDRRMO) nga irekomendar sa konseho sa dakbayan nga idili sa publiko ang pagpangaligo sa may Pajara Mini Park, Brgy. Umapad, ilawom sa Marcelo Fernan Bridge tungod sa kadelikado niini.
Kagahapon, ang pangulo sa CDRRMO nipadayag sa iyang kahingawa nga daw nahimong public beach ang dapit nga gipaliguan sa di mominos mga 3,000 ngadto sa 5,000 ka mga tawo atol sa Easter Sunday.
Sumala ni Suico nga hugaw ang tubig sa maong dapit sanglit duol kini sa dumpsite, kusog ang sug sa tubig ilabi na kon mohunas o motaob ang dagat ug wa say life guard nga nadestino.
Ang dapit nahisakop na sab sa Mactan Channel nga agianan sa mga passenger ug cargo vessel, ug si bisan kinsa ang maligo, dako ang posibilidad nga madala sa sug sa dagat.
“Wala mi mag-expect nga ingon ato kadaghan ang mangaligo. Wa pa ta kahibaw kon ang tubig diha maayo ba, safety ba sa atong mangliguay,” ni Suico sa mga tigbalita.
Niadtong Dominggo, nakurat siya ug ang iyang buhatan nga ang dapit gidagsa sa mga tawo diin nagtulda ug nag-picnic pa.
Plano ni Suico nga makigtagbo sa City Environment and Natural Resources Office ug City Health Office aron hisgutan ang pagkuha og sample sa tubig.
Apilon usab ni Suico ang duha ka buhatan sa pagtabang kaniya paghimo og rekomendasyon ngadto sa konseho sa resolusyon sa pagdili o pag-regulate sa pagpangaligo sa maong lugar.
Sa iyang bahin, si Atty. Elaine Bathan, executive secretary ni Mayor Luigi Quisumbing, niingon nga tun-an nila pag-ayo ang rekomendasyon sanglit nakasabot sila sa mga residente nga maligo sa dapit ilabi na nga nagsingabot na ang summer season.
Dugang ni Bathan nga modugok gyud ang mga residente dinhi ilabi nga nga duol, libre ug daling makaliguan apan iyang gitataw nga seguraduon unya sa city hall ang kaluwasan ug seguridad sa tanan.