KADTONG niadto sa Island Garden City of Samal (IGACOS) sa Semana Santa maka-relate niining maong kasinatian.
Ang among silingan sayo kaayo niadto sa Sasa Wharf lunan sa ilang Ecosport nga kotse. Gusto nilang motabok sa Samal niadtong buntag sa Sabado. Wala sila namahaw aron makauna nga makaligo sa daghang resort didto.
Apan sa paghiabot nila sa Sasa, ilang nalantawan nga hapit usa ka kilometro ang gitas-on sa nagpila nga sakyanan. Abi nila nga sa Dominggo sa Pagkabanhaw lamang ang trapik apan nasayop sila.
Nakasakay sila sa barge lampas alas 9:00 na sa buntag.
Ang ubang nagpila nibalik na lang sa ilang gigikanan ug nangita'g laing kaligoan. May nangadto sa mga resorts sa Barangay Caliclic sakay sa bangkang de motor.
Ang uban didto na nangaligo sa swimming pool imbis nga magtampisaw unta sa mabugnaw'ng tubig sa dagat.
May uban nga didto na lang sa banyo nila naligo. Mas maayo pa sa banyo kay way gasto ug way kompetensiya. Apan lagi mas nindot man maligo sa dagat tungod sa naglagiting nga kainit sa panahon.
Uso sab ang kalintura ug heat stroke tungod sa panahon nga di nato masabtan.
Hinuon nalipay karon ang mga anaa sa construction business kay way balda sa ilang trabaho. Hasta sab kadtong naglandag sa ilang kopras, mais, humay, cacao ug nagbulad og isda kay nalipay sa panahon karon.
Ang Samal maoy pinakaduol nga dagat nga nindot ligoan natong mga taga Davao. Busa daghan ang nangutana kung nganong hangtud karon wa pa masugdi ang taytayan o tulay nga mokutay sa Davao City ngadto sa IGACOS? Dugay na kini natong madunggan nga proyekto ug nahimo kining daw saad sa politiko nga wa matuman. Usa kini ka plano nga mora'g eroplano nga nagsige la'g lupad ug wa motugpa. Tinuod kaha nga interesado ang atong kagamhanan nga magtukod og tulay?
Sa pagkatinuod, niadto pang 2000 nako nabasa nga nahiapil kining proyekto sa Regional Development Plan sa Region XI Development Council nga pagapundohan sa Japanese International Cooperation Agency (JICA).
Kauban kini sa plano nga magtukod og Davao International Airport sa Barangay Callawa, Buhangin District.
Gikan niadto may madunggog akong istorya nga dili madayon kay gasto kaayo. Wala daw lugar nga pabor nga butangan og tulay.
May istorya sab nga di daw mosugot ang mga negusyante sa barge, lansa ug bangka kay makulban og kaldero. Lakas daw sila sa anaa sa gahum mao nga ilang napugngan ang proyekto.
Sa akong nasayran, gawas kanila halos tanang tawo sa IGACOS, Davao City ug Davao del Norte gusto nang mahuman kining tulay aron hingpit nang molambo ang IGACOS ug mahimong importanteng sentro sa Turismo sa rehiyon.
Dali na lang unya ang biyahe paadto-balik sa Samal ug ang pagtumod sa ilang mga produkto nganhi sa atong siyudad sa Davao.
Para kanako kulang pa gihapon ang "political will" sa mga anaa sa gahum aron matuman kining damgo. Kung nahimo ni anhing Pres. Marcos ang gibantog nga San Juanico Bridge sa Samar ug Tacloban nganong dili kini matuman sa panahon ni PRody nga taga Davao?