ALEOSAN, North Cotabato - Patay ang usa ka bomb expert ug opisyal sa Bangsamoro Islamic Freedom Fighters (BIFF) sa gilusad nga law enforcement operation alas 4:00 sa hapon niadtong Dominggo.
Giila ang suspek nga si Budz Basilan, senior commander sa BIFF ug hanas sa paggama og improvised explosive device (IED) nga gibansay ni kanhi Malaysian terrorist Zulkifli bin Hir, alyas Marwan.
Gibutyag ni 6th Infantry (Kampilan) Division Spokesman, Captain Arvin Encinas nga gironda sa hiniusang puwersa sa 34th Infantry Battalion, Philippine Army ug kapulisan ang balay ni Basilan sa Sitio Bakayawan, Barangay Dunguan, Aleosan.
Apan misukol ang suspek sa mga awtoridad resulta sa 15 minutos nga sinukliay og mga bala.
Napatay si Kumander Budz human nakaangkon og daghang samad sa nagkadaiyang parte sa lawas.
Narekober sa balay sa napatay ang usa ka M16 Armalite rifle, usa ka kalibre .45 nga pistola, mga bala ug mga kagamitan sa paggama og bomba.
Dugay na nga gipangita sa militar ug kapulisan si Basilan nga nalambigit sa kaso nga pagpamomba, multiple murder, multiple frustrated murder, arson, robbery hold-up ug kidnapping.
Apil sab ang suspek sa 200 ka local islamic militant's nga dunay warrant of arrest nga gipagawas ni Martial Law Administrator Delfin Lorenzana.
Samtang padayon pa gihapn nga gilutos sa militar ug kapulisan ang BIFF sa mga probinsiya sa North Cotabato ug Maguindanao.