NAHIMONG tensyonado ang rally sa mga trabahante sa Coca-Cola Bottlers Philippines Incorporated sa Mc Arthur Highway, Barangay Bago Aplaya, Davao City human ilang gibabagan nga mogawas ang 40 ka mga panel truck alas 10 kagahapon sa buntag.
Alas 5 sa buntag nagsugod ang rally gawas sa planta human giingong dunay matigayong pagpangtanggal sa ilang mga empleyado ubos sa Work Expert and Allied Services Agency (WEASA) nga gipangunahan ni Joram Bantayan, alyas Ting sa Kilusang Manggagawa Ng Coca-Cola (KIMACO).
Sumala ni Chief Inspector Ronald Lao, hepe sa Talomo Police Station, miresponde sila sa dapit human mitawag kanila ang pipila ka opisyal sa maong patigayong nga giharang ang ilang mga panel sa pipila ka mga trabahante nga nag-rally sa gawas.
Pag-abot sa mga pulis, giistorya sila nga manghawa aron makaagi ang mga panel truck apan nagmagahi sila hinungdan nga gipangsikop sila sa mga pulis.
Napulo sa mga nag-rally ang gisikop sa kapulisan ug gidala kini sa istasyon samtang nakig-istorya kang Lao ang pipila ka leader sa mga progresibong pundok aron mabuhian ang ilang mga kaubanan.
Nagpahigayon og strike ang pipila ka mga trabahante diin buot nila nga di mahitabo ang pagpananggal ug didto kini istoryahon sa Department of Labor and Employment (DOLE).
Nasagmuyo sila human giingong pangtanggalon sila ug ilisdan
sila sa bag-ong mga na-hired gikan sa B-Mirk Multi-Purpose Coordination (BMPC) Agency.
Alas 11:30 kagahapon sa buntag malinawon nga naundang ang rally samtang miluag na ang dagan sa trapiko sa dapit.
Apan bisan paman, giandam gihapon sa kapulisan ang kasong Grave coercion batok sa mga dinakpan sanglit dunay nagreklamo ang pagpahigayon og rally sa mga nahisgutan.
Sukad sa pagsuwat ning balita wala pa mihatag og pamahayag ang grupo sa mga nag-rally lakip na ang kompanya.