ITUGYAN na sa contractor ngadto sa Artsidyosesis sa Sugbo karong Sabado ang pavilion nga maoy pahigayonan sa ika-51 nga International Eucharistic Congress sa Enero sunod tuig.
Ang pavilion buksan karong Nobiyembre 22, ang Dominggo sa Solemnidad sa Cristo Rey o Christ the King Sunday.
Usa ka pontifical mass ang saulogon sa alas 4:00 sa hapon nga pangulohan mismo ni Cebu Archbishop Jose Palma.
Human sa misa, isunod ang Eucharistic procession sud sa pavilion.
Ang kaparian sa Artsidyosesis ug ang mga sakop sa working committees sa IEC-Cebu motambong sa dakong kasaulogan.
Ang organizers mopahigayon usab og duha ka adlaw nga dry runs karong Nobiyembre 22 ug 23 sa IEC Pavilion ug ang mga rota sa bus nga sakyan sa mga delegado sa Barangay Mabolo, siyudad sa Sugbo.
Sa Nobiyembre 22, ang dry run himuon sa IEC Pavilion dungan sa selebrasyon sa Cristo Rey.
Samtang sa Nobiyembre 23, ang dry run mosusi sa mga rota palibot sa pavilion ilabi na sa mga dan sa Pope John Paul II ug Gov. Cuenco Ave.
Ang pavilion gisugdan og tukod sa Duros Land Properties Inc. sa niaging tuig ug gitapos na lang karon ang ginagmay nga pagtrabaho ug ang paghimutang sa mga ekipo nga gamiton.
Ang pavilion maoy gamiton sa inadlaw nga sessions sa 51st IEC karong Enero 24-31 sa sunod tuig nga tambungan sa gibanabanang 15,000 ka mga delegado gikan sa tibuok kalibotan.
Samtang padayon ang pagbansaybansay sa 400 ka mga diocesan ug religious priests sa Sugbo alang sa umaabot nga Cebu Clergy Concert karong Nobiyembre 26 ug 27.
Apil sa mopasundayag si Palma ug ang bag-ong natudlo nga auxiliary bishops sa Cebu nga sila si Bishops Dennis Villarojo ug Oscar
Florencio.
Ang mga ticket nagkantidad og P1,000, P500 ug P300 nga gipamaligya sa mga parokya sa Sugbo.
Ang kita sa tickets idugang sa pundo alang sa 51st IEC.
Gawas sa mga pari, apil sa mopasundayag ang Mandaue Children’s Choir, Archdiocesan Seminarians of Cebu ug Basilica Minore Del Santo Niño ug Cebu Metropolitan Cathedral grand choirs.