MAGTIAYONG albularyo gipusil ug gitigbas sa duha ka mga tawo kay nagdumili sa pagtambal sa usa ka masakiton niadtong Lunes sa alas 7 sa gabii sa Sitio Saksak, Barangay Owak, lungsod sa Asturias, Cebu.
Si Emeliano Bantoy, 79, dead-on-arrival (DOA) sa tambalanan sa Balamban samtang ang iyang asawa nga si Juanita, 75, kritikal nga gidala sa tambalanan sa dakbayan sa Sugbo.
Si Sr. Inspector Jade Sumugat, hepe sa Asturias Police Station nga nahinabi sa Superbalita Cebu, nagkanayon nga duha ka wa mailhing mga tawo nga nagsakay sa motorsiklo ang nipusil ug nitigbas sa magtiayon.
Si Emeliano dunay samad pinusilan sa ulo ug lawas ingon man samad tinigbasan sa kalawasan samtang si Juanita dunay lawom ug dakong samad sa ulo agi sa tinigbasan.
Si Juanita nibutyag nga naabot sa miaging gabii sa ilang balay ang duha ka wa mailhing mga tawo sakay sa motorsiklo.
Nihangyo nga dalhon nila ang managtiayong mananambal sa lungsod sa Balamban kay dunay kabanay nga patambalan.
Apan si Juanita nisaysay nga mibalibad ang iyang bana sa hangyo kay lawom nang gabii unya layo ang lugar ug madugay na sila sa pagpauli.
“Nasuko daw ning duha ka suspek kay mibalibad si Emiliano kay gabii naman kaayo. Gikapoy guro ang tiguwang nga mananambal kay bukid pud daw sa Balamban nagpuyo ang magpatambal,”dugang ni Sumugat.
Sa kasuko, gitigbas si Emeliano, ingon man gipusil samtang diha sila sa nataran sa ilang balay.
Si Juanita gitigbas usab sa usa sa mga mamumuno, apan bisan samdan nakadagan ug nakapangayo og panabang sa mga silingan samtang ang mga killer ningsakay pagbalik sa ilang motorsiklo.