ARON panalipdan ang katungod batok demolisyon, mga menor de edad nangandam karon aron pugngan ang demolition team nga moguba sa ilang panimalay sa dalang Quezon Boulevard, Salmonan, Barangay 26-C Poblacion, dakbayan sa Davao.
Mga menor de edad nagbutyag sa SunStar SuperBalita nga ilang himuon ang tanan aron matabangan ilang mga gikinanan.
Tungod niini, naghangyo karon ang 67 ka mga sakop sa Quezon Boulevard Muslim-Christian Neighborhood Association kang Mayor Sara Duterte-Carpio nga pugngan ang demolisyon sa ilang lugar.
Ang hangyo maoy unod sa petisyon nga gipatik sa tarpaulin nga gipaskin sa ilang lugar.
Mga molupyo sa dapit naghangyo nga ipatuman sa mayor ang saad ni Pangulong Rodrigo Duterte nga walay demolisyon nga himuon sud sa iyang termino.
Ang kabalaka sa mga molupyo nagsugod dihang miabot ang usa ka negusyante nga nagpaila nga maoy tag-iya sa luna niadtong 2011.
Giingon nila nga 65 ka tuig na silang nagpuyo sa lugar nga kaniadto tubigan pa, apan tungod sa ilang pagtinabangay, gitabakan ang lugar hangtud nga minindot ang dapit.