MIHIMO na usab og opensiba si Presidential Assistant for the Visayas Michael Dino batok sa “kanhi laos nga pulitiko” kabahin sa pagkuyanap sa illegal nga drugas dinhi sa Sugbo. Kini human miluwat og pamahayag ang “kanhi laos nga pulitiko” nga nagbasol kang Presidente Rodrigo Duterte nga wala maka-kontrolar sa China sa pagpalusot og drugas dinhi sa nasod. Kadaghan sa mga drugas labi pa ang shabu nga gipalusot gikan sa China. Nahadlok daw si Duterte sa China.
Midepensa si Dino sa Presidente nga dili angayan basulon kay walay labot ang drugas ug ang foreign policy sa iyang administrasyon. Gilabtikan dayon ni Dino ang “kanhi laos nga pulitiko” nga maoy angayan basulon kon ngano nga mikuyanap ang drugas dinhi sa Sugbo. Matod ni Dino nga usa sa nga rason nganong wala masumpo ang illegal drugs gumikan kay adunay mga lokal nga pulitiko nga nag-protohir sa mga druglords sama dinhi sa Cebu City.
Iyang gitumbok mismo ang “kanhi laos nga pulitiko” nga matod pa midawat og protection money gikan kang anhing druglord Jeffrey “Jaguar” Diaz. Midawat kini og P5 milyones nga campaign fund ug P2 milyones nga tabang sa iyang pagka-ospital. Pinasikad kini sa affidavit nga giluwatan ni Reynaldo “Jumbo” Diaz, ig-agaw ni Jaguar, nga naa karon sa posisyon ni Justice Secretary Vitaliano Aguirre II. Pero gipanghimakak kini sa “kanhi laos nga pulitiko” og nanghagit pa nga ikiha siya.
Tinuod no, kon dunay igong kapasikaran ang DOJ base ning maong affidavit, nganong dili man nila ikiha kining maong kanhi laos nga pulitiko? Kon sige lang god og pamasangil, walay kahumanan kining maong away. Mahulog nga puro lamang kini propaganda, publisidad ug pamulitika. Gikuwestiyon ni Dino kon unsa man ang iyang nahimo batok sa illegal drugas sulod sa 30 ka tuig nga nagdumala niya sa dakbayan.
Mora man ni sila og iro ug iring. Inay iyahay og pa-pogi points, nganong dili man suporta hinuon ang kampanya sa kasamtangang administrasyon batok sa illegal nga drugas? Kon kanunay silang mag-away magkatawa na hinuon ang mga durugista. (bobbygnalzaro@gmail.com)