Editoryal: Aguirre taktakon?

Editorial Cartoon by Ariel Itumay
Editorial Cartoon by Ariel Itumay

DI pa man tuod kompirmado, apan kusog karon ang hugon-hugon nga taktakon ni Presidente Rodrigo Duterte ang perming nakontrobersiyal nga secretary sa Department of Justice (DOJ) nga si Vitaliano Aguirre II.

Kon tinuod man gani ni, usa sa mobahakhak unya niini mao ang iyang numero unong kontra nga si Cebu City Mayor Tomas Osmena kinsa, ning uwahi lang, mipadayag nga angayan palagputon si Aguirre sa iyang puwesto.

Niulbo og maayo ang panagbikil tali sa duha sa dihang gipasanginlan ni Aguirre nga usa sa mga drug protector si Osmena nga nakadawat og P7 milyones gikan sa napatay nga drug lord nga si Jeffrey “Jaguar” Diaz.

Ang giluwatan nga pamahayag ni Aguirre maoy iyang bawos sa gipadayag usab ni Osmena nga ipa-disbar ang kasamtangang DOJ secretary tungod sa pagdapig niini sa SM City nga gikiha unta sa Mayor.

Pero kon mahinayon man ang pagtaktak ni Aguirre, dili kini tungod sa ilang panagbikil ni Osmena kon dili tungod kini sa sunodsunod sa mga kontrobersiyal nga desisyon sa DOJ ilabi na ang pag-dismiss sa kaso batok sa giingong nag-unang drug lord sa nasod nga sila si Kerwin Espinosa ug ang negusyanting si Peter Lim.

Kini maoy nakapaulbo sa kaspa sa Presidente ilabi na nga nakabaton ang maong desisyon og grabing pagsaway gikan sa kinabag-an sa publiko ug naghatag og lama sa kampanya sa administrasyon batok sa gidiling drugas.

Laing nakapatingkag sa dawunggan sa kinabag-an mao usab ang pagdawat sa DOJ nga mamahimong state witness si Janet Napoles sa PDAF scam nga naglambigit sa pipila ka mga senador ug kongresista sa nasod.

Angayan lang sab siguro nga palagputon si Aguirre sa iyang position kay nagdaghan man hinuon ang kontrobersiya nga iyang nahimo unya wa ta kakita og maayong performance.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph