15 anyos, uyab sikop sa buy bust

KINSE anyos nga dalagita uban sa iyang uyab nga anak sa gidudahang drug lord nakuhaag binultong shabu dihang nadakpan niadtong Martes sa alas 4:30 sa hapon sulod fast food chain sa usa ka mall sa dalan Sanciangko, Barangay Pahina Central, dakbayan sa Sugbo.

Ang dalagita taga Brgy. Suba, dakbayan sa Sugbo, nasikop uban sa iyang uyab nga si John Kenneth A. Tañajura, 18.

Si John Kenneth, anak ni Niño Tañajora, kinsa gi ambusan patay niadtong miaging simana.

Nadakpan hinuon ang duha ka riding in tandem nga mga menor de edad ug 18 anyos diin drugas ang motibo.

Si Niño giingon nga utangan og illegal drugs hinungdan nga gipapatay, sumala sa mga suspek nga nasikop.

Si Leah Albiar, tigpamaba sa Philippine Drugs Enforcement Agency (PDEA-7), niingon nga ang mga suspek nakuhaan sa ilang mga ahente atol sa buy bust operation og tulo ka dagkong putos sa shabu nga mitimbang sa 70 gramos nga mobalor og P350,000.

Ang dalagita ug uyab nga si John Kenneth niangkon sa pagpamaligya sa drugas diin sila mopaginansiya og P1,000 sa tag P15,000 nga matag bulto.

Ang shabu nga ilang supply gikan sa transaksyon sa Cebu City Jail.

Si John Kenneth nitug-an nga iyang tiyo nga naa sa prisuhan ilang kontak kun mokuha silag shabu.

Ang iyang mama nabilango pud tungod sa pagnegosyo sa drugas.

Matod niya nga kuyog nila ang higalang 17 anyos nga usa ka bayot nga nakasibat atol sa buy bust operation.

Sumala pa niini nga naglubong pa sila sa iyang papa nga si Niño dihang ang bayot nga higala sa iyang uyab nagtawag nila didto pa sa menteryo nga dunay kustomer nga mopalit og shabu.

Tungod niini, nibiya silag una sa menteryo ug gi-deliver nila ang drugas.

Ang nakaikyas nga bayot ilang baligyaan sa P16,000 nga shabu diin usa kalibo lang ang patong pero ang bayot mopaginansiya sab sa nakuha niining shabu.

Ibaligya niini og tag P24,000 matag bulto.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph