USA ka 11 anyos nga batang babaye ug kaubang 12 anyos nga lalake nga mga sakop sa Alpha Kappa Rho (Akhro) giingong gipugos sa pagpasuyop sa ilang mga kauban sa fraternity og shabu sa Brgy. Simala, lungsod sa Sibonga, Cebu.
Ang mga menor de edad nga sakop sa Akrho giubanan sa ilang mga ginikanan kagahapon sa buntag, ni-report sa Sibonga Police Station hinungdan nga duha ka mga sakop sa Akrho nadakpan. apan ang usa nakaeskapo.
Ang duha ka mga pulos taga dakbayan sa Carcar, apan gipugngan ang mga ngan subay sa gimbut-an sa balaud kalabot sa mga menor.
Nasikop mao sila si Michael Olanda, 20, taga Sitio Kabukugan, Brgy. Poblacion Sibonga; Armel Cuizon, 22, dunay ka live-in partner, taga Sitio Kabukugan, Brgy. Poblacion Sibonga; Marvin Aliponga, 19, taga Sitio Ilihan, Brgy. Simala, Sibonga, samtang wa masikop si Archel Lambayan, 19, ulitawo, taga Ilihan gihapon.
Ang mga suspek ug mga biktima pulos sakop sa Akrho fraternity, matod sa kapulisan.
Si Senior Inspector Stephen Amamag-id, hepe sa Sibonga Police Station nga nahinabi sa Superbalita Cebu, nagkanayon nga Martes sa gabii nag-abot ang grupo sa Poblacion, uban sa mga ka brod sa fraternity kay nag-inom.
Apan pagkakadlawon, gipugos sila sa pagdala sa Sitio Ilihan ug gipugos sila sa pagpasuyop og shabu sa upat ka mga suspek.
Ang mga bata ningbalibad kay buot na nilang mobiya sa ilang fraternity, apan gihulga silang patyon sa mga suspek.
Si Amamag-id niingon nga ang mga bata ningtug-an nga si Olanda, 20, maoy nagsige og hulga kaniya dihang gipugos sila sa pagsuyop og shabu sa balay sa laing suspek.
“Basta di daw sila mosuyop pamatyon. Kay nangahadlok man, napugos sila sa pagsuyop sa ikaduhang higayon,”dugang ni Amamag-id.
Gipadayag niining gusto na unta sa mga biktima nga mobiya sa grupo, apan nagpabilin ang ilang kahadlok tungod sa pagpanghulga.
Ang mga suspek nadakpan sa kapulisan, nakuhaag mga drug parapherbalia human ni-report sa police station ang ilang mga kauban sa fraternity uban sa mga apuhan sa mga biktima ug kabanay.