HUMAN sa pagpanakop sa nag-counterflow sa mga siyudad sa Sugbo, Mandaue, Lapu-Lapu ug ubang mga dapit sa probinsiya, gidili usab sa Mandaue ug Lapu-Lapu ang pagsul-ob og maskara ug dili hustong mga helmet sa mga magsakay og motorsiklo. Nakadesiplina kini sa daghang mga badlungong drayber.
Karon kinahanglang estriktuhon na usab ang pagpatuman sa anti-jaywalking ordinance labi na gyud sa Cebu City ug Mandaue City. Kining mga malapason magpataka lang og labang bisan kon green light o go ang traffic signal. Daghan usab dili mosubay sa gitakdang pedestrian lane. Daku kining matampo sa kahuot sa traffic ug risgo sa mga pedestrian.
Kining kampanya sa jaywalking suol-suol.
Usahay anaay operasyon apan maglabi ang tapul sa mga tinugyanan sa trapiko. Kon mag-operasyon sila kaniadto sa anti-jaywalking daghang madakpan nga ibalhug sa sakyanan nga ilang himuong prisohan. Gawas sa multa pahimuon usab sila og community service sama sa pagpanglimpiyo sa mga canal ug ubang dapit. Human niini mahadlok na mag-jaylking ang mga tawo apan kon motapul na usab ang mga tinugyanan sa trapiko, mobalik na usab ang pagpataka og labang sa pedestrians. Kinahanglang sustinihan sa atong gobiyerno ang pagpatuman sa mga ordinansa ug ubang mga lagda ug reglamento sa trapiko aron madisiplina ang mga badlungon sama sa pagka-desiplina sa mga motorista batok sa pag-counterflow ug pagsul-ob og maskara nga maoy sagad buhaton sa mga kriminal. Mao kini gibuhat sa ubang mga dapit sa Pilipinas. Nganong di man nato kini buhaton dinhi sa ato?
Naa usay wala pa istriktong mapatuman sa mga mall nga adunay escalator. Nakasuwat niini ang pahimangno nga ang tuong bahin sa escalator alang sa “stand” kun magtindog lang samtang sa walang bahin nakasuwat ang “walk” kun alang sa mga tawo nga dili maghunong kon dili molakaw padung sa itaas o kaha paubos. Ang kadaghanan natong makita mao nga ang tanang bahin sa escalator ukopahan sa mga magtindog ug dili na makaagi ang buot molakaw. Simpli lang kini, apan daku kinig matabang aron mahapsay ang pagsakay sa escalator.
Di na gayud kapugngan ang barangay ug Sangguniang Kabataan (SK) elections karong sunod buwan. Bisan og napasar sa Ubos Balay-Balauranan sa third reading ang balaudnon nga mag-uswag na usab unta sa maong eleksiyon sa Oktubre apan wa nay panahon ang senado nga mopasar og balaudnon kalabut niini. Uyon na usab si Presidente Duterte sa paghimo sa maong piniliay.
Kalabut niini, akong hangyuon ang mga botante sa barangay ug SK nga hashasan pag-ayo ang ilang butohan pagka-kapitan ug mga konsehal ug mga sakop sa SK. Atong ipakita nga nakat-on na kita sa pagpili og mga opisyal nga atong palingkuron sa mga buhatan sa barangay nga maoy basic political unit sa nasud. Mao kini unang eleksiyon sukad milingkud si Presidente Digong sa Malacañang. Ato kuno kining itandi kon dili na ba kita matintal sa salapi nga ihatag sa mga kandidato labi na sa mga narco-politician.
(msr1144@yahoo.com)