DAGHAN ang niingon nga sa kadugayan maanad ra ang mga tawo sa kahuot sa trapiko sa Sugbo.
Apan nakahibawo ba kamo nga dunay balor ang kahuot sa trapiko?
Mao kini ang alkanse sa atong ekonomiya.
Sumala pa sa pagtuon sa Japan International Cooperation Agency (Jica), mokabat sa P1.1 biyunes ang mawagtang sa ekonomiya sa Metro Cebu matag adlaw tungod sa kahuot sa trapiko.
Si Gordon Alan Joseph, presidente sa Cebu Business Club (CBC), nga maoy nibutyag sa maong pagtuon, niingon nga mas mograbe pa ang kahuot sa trapiko ug modako pa ang mawagtang sa atong ekonomiya.
Matod pa ni Joseph mao kini ang pasiunang findings sa pagtuon sa Jica nga gipaabot nga mahuman sa talinapos ning tuiga.
Inigkahuman sa maong pagtuon, mas mosamot pa gyud ang trapik sa Sugbo.
Ang maong pagtuon giulohan og “Master Plan Study and Institutional Development on Urban Transport System in Metro Cebu.”
Nindot nga dunay master plan sa trapiko sa Sugbo. Dunay master plan kaniadto apan wa mapatuman. Basin mapatuman kining maong pagtuon.
Ang labing klaro mao nga mas menos ang pundo nga gibubo sa gobyerno alang sa obras publikas dinhi sa Sugbo. Kon dunay pundo nga makuha ang mga kongresista alang sa mga proyekto babagan sab.
Di maapektohan sa ordinaryong mga lungsuranon ang mawagtang sa ekonomiya tungod sa kahuot sa trapiko.
Apan ang di malikayan mao ang kalangay. Mao kini ang pirming katarungan kon ma-late -trapik.