MAKAKATAWA lang ta aning pahimangno sa Commission on Elections (Comelec) ngadto sa mokandidato sa umaabot nga barangay elelctions nga dili magpasilong sa pulitikanhong landong sa mga pulitiko. Matod pa sa taga Comelec nga ang barangay election non-partisan. Buot ipasabot nga dili angayan mopadapig o mosandig ang mga barangay candidates sa usa ka partido. Magpabilin silang neutral.
Unsa? Kataw-anan lagi kining maong kamanduan. Dinhi lang sa dakbayan sa Sugbo, kinsa man sa mga barangay kapitan ang nagpabiling neutral ug wala mo-abin sa Bando Osmena Pundok Kauswagan (BOPK), Barug PDP-Laban o Team Rama. Ang tanang kapitan midapig gyud og partido. Kon magpabilin nga neutral ang usa ka kapitan kay non-partisan lagi, nganong mismo ang mga Association of Barangay Council (ABC) presidents nga ex-officio member sa mga konsiho, modapig man og partido?
Nganong si Cebu City ABC President Philip Zafra, mi-abin man lagi sa oposisyon sa Konsiho? Gani mihural naman siya sa PDP-Laban? Dili na lang god ta magminaot nga kining mga barangay officials mga pulitiko na ni sila. Nganong modapig sila og partido? Aw, gumikan sa pundo.
Funding
Adunay ubang mga kandidato nga makasagubang sa galastuhan sa piniliay apan ang kasagaran magyango-ngo sa mga pulitiko nga ilang gisandigan. Sama dinhi sa dakbayan sa Sugbo, ang mga kaalyado sa BOPK adto mangayo og tabang sa mayor nga ilang gi-ila nga lider. Maayo ang mayor kay makagamit sa kuwarta sa Dakbayan paghatag og hinabang sa iyang mga kaalyado nga ipaagi lang sa mga proyekto. Ug mohatag pod kuwarta nga gikan sa iyang personal nga bulsa.
Unya ang taga Barug adto magyango-ngo ni Vice Mayor Edgardo Labella o kanhi Mayor Mike Rama. Unsa may ihatag ni Mike? Gawas kon daghan siyag kuwarta nga nahibilin sa miaging eleksiyon. Aw, basin og mosuporta si Presidential Assistant for the Visayas Michael Dino. Unya ayaw kog ingna nga mogasto si Dino sa iyang kaugalingong kuwarta? Mangayo pod na sa mga negosyante. (bobbgnalzaro@gmail.com)