Super Suroy: Ang Bethlehém sa Tabuelan

PANGANDOY ni Fe Oca Yasuda niadto nga makataak sa natawhan ni Hesus didto sa nasud sa Israel.

Tuod man, niadtong 1996, si­ya ug ang iyang bana nibisita sa Bethlehem, ang gituohang na­taw­han ni Hesus sa maong nasud.

Duha ka semana si Fe ug iyang bana sa maanindot nga nasud, ilang giadto ang natawhan ni Hesukristo, balay ni Birheng Maria ug uban pa.

Pipila ka tuig human sa ilang pagsigeg laag sa bisan asang suok sa kalibutan, nakahuna-­huna ang magtiayong Yasuda nga magtukod og resort.

Dinhi natawo ang Bethlehém de Parádise Resort sa Maravilla, lungsod sa Tabuelan, lalawigan sa Sugbo.

Matod ni Fe, tag-iya sa resort, nga base sa iyang naunang ideya, himuong pribado lang unta ang paggamit sa resort apan tungod sa ka­dag­hang magsige og inquire ka­labot niini maong ila kining giablihan sa publiko.

Nahuman ang pagtukod sa Bethlehém de Parádise Resort sa milabayng tuig ug nagsugod kinig panawat og mga guest atol sa Ironman sa Tabuelan niadtong Septiyembre.

Unsay naa sud ug rate?

Adunay mga lawak, function room ug swimming pool ang resort.

Si Fe niingon nga ang ilang mga upat ka family room nagkantidad og P4,000 matag usa, matag gabii nga good for 4-8 person.

Samtang ang duha ka single king bed anaa sa P3,000 per night good for 2-4 person.

Gawas niini, modawat sab og mga kalihukan sama sa kasal ug birthday ang Bethlehém de Parádise Resort.

Ang ilang rate sa mga kalihukan per head anaa sa P250 ngadto sa P300 sa gibana-bana nga 150 ka tawo ug ang rate depende sab sa pagkaon nga ilakip sa menu.

Kalabot sa ilang swimming pool, ang Bethlehém de Pa­rá­dise Resort nag-charge og P200 sa dagko ug P150 sa mga bata, lakip na sa entrance ang paggamit sa swimming cap sanglit giawhag man sa management ang pag­sul-ob og niini uban sa sak­tong swimming attire.

May gamayng garden sab ibabaw sa resort, gamayng langub sa ubos ug restaurant nga abli sa tanan.

Plano ni Fe nga tukuran unya ang kilid sa resort og five storey building nga butangan unya og dugang conference room ug function room, coffee shop ug convenience store aron di na mahasol og gawas ang ilang mga guests sa resort.