MOABOT ngadto sa 40 ka mga Grand Masters ang moanhi sa Sugbo aron maghiusa sa pagpromote sa arnis atol sa Festival of Eskrima Kali Arnis sa Mountain Wing Atrium sa SM City Seaside karong Sabado ug Dominggo.
Ang duha ka adlaw nga kalihukan ablihan pinaagi sa proper competition sa Sabado ug pagasundan kini sa usa ka free clinic ug demostration sa mga grandmasters nga magpakita sa nagkalainlaing styles sa arnis.
“This is historical. It will be the first time that we will have 40 grandmasters in one event,” matod ni supreme grand master Dionisio “Dionnie” Cañete sa usa ka press conference sa La Fortuna Hotel kagahapon.
Si Canete kinsa magsaulog sa ika-80 ka tuig nga kasumaran sa iyang adlawng natawhan, mipasabot nga dili sayon ang paghiusa sa 40 ka grandmasters apan tungod sa ilang usa ka katuyoan kini nahimo.
Si Philippine Eskrima Kali Arnis Federation (Pekaf) president Gerald Cañete, anak ni Dionnie, miingon nga ang event maoy kabahin sa unifying process sa Eskrima Arnis. Gipaluyohan sa Philippine Sports Commission (PSC), ang mga GM nga motambong sa maong event nagagikan sa Cebu, Manila, Zamboanga, Dumaguete, Bacolod, Ioilo, Davao ug Cotabato.
Atol sa presscon diha usab ang mga practitioners gikan sa Korea, Japan ug United States.
Si Cebu City Sports Commission (CCSC) commissioner Allan Delantar mipadayag nga hugot usab ang ilang pagsuporta ning maong kalihukan sanglit ang arnis maoy kabahin na sa kultura sa mga Filipino. (RSC, JBM)