GIBUTYAG sa Davao City Police Office (DCPO) nga ipatuman nila ang “maximum tolerance” batok sa mga residente sa Quezon Boulevard, Salmonan, Barangay 26-C Poblacion, dakbayan sa Davao kung mohimo sila bayolente nga pamaagi kung moabot na ang demolition team.
Pintok nga gibutyag ni DCPO director Senior Superintendent Alexander Tagum nga magpasayloay nalang gumikan ipatuman gayud nila ang maximum tolerance ugaling duna nay komosyon ug anaa na sa delikado nga kahimtang ang kapulisan, court sheriff ug demolition team.
"Pag-inatake nyo na ang mga pulis ko, tapos masusugatan na sila, baka delikado na mamatay, pasensiyahan na tayo, I will implement the police operational procedure," ingon ni Tagum atol sa ambush interview sa mga tigbalita kagahapon.
Gipasabot hinuon ni Tagum nga mag-agad sila sa level sa ilang tolerance aron mapanalipdan lang ang magpatuman sa pag-demolis luyo sa impormasyon nga nangandam ang mga residente og mga botelya, puthaw ug mga bato nga maoy giingong gipanglabay sa mag demolis.
"We will abide the maximum tolerance but we should remember nga naa tay level sa atong maximum tolerance," sulti ni Tagum.
Giingon sab ni Tagum nga subo sa ilang bahin ang mahitabo, apan kinahanglan gayud sundon ang balaod ug nanghinaut ang kapulisan nga walay mahitabong tensyon ugaling ipahigayon na ang demolisyon.
"Maski maluoy man mi sa mga settlers diha, but because naa nay decision ang korte, wala mi mahimo, we adhere to implement the law nga kung ma-request na ang court sheriff nga mohawa, mohawa nalang gyod kay naa namay legal order ang korte," dugang niya.
Hinuon, una nang gipamahayag ni Davao City Mayor Sara Duterte-Carpio nga dunay gitagana nga abogado aron motubag ug manalipod sa katungod sa mga residente.
Giingon sab sa Mayor nga wala na siya'y mahimo niini kun di ang pagtuman sa writ of demolition gikan sa korte sa pag-demolis sa dul-an 200 ka mga panimalay sa nasampit nga lugar.