DILI ni titulo sa kanta, mga higala. Maayo’ng adlaw diay kaninyo dinha.
Human na ang Semana Santa ug adlaw’ng Biyernes, daghang tulunghaan nga done na sa aktibidad sama sa mga recognition ug graduation mao taas-taas ang pahulay sa mga ginikanan sa mga galastuhon apan sugod na pod sa pait-pait ginagmay sa mga higala natong drayber kay minus ang mga manakayay, mga bay! Ayayay!
Bitaw, naggahin ko'g panahon nga makapamalandong bisan sud ra sa akong lawak, igsuon. Banha na man god kaayo ang kalibutan mao usahay apektado sa impluwensiya niini ang atong paggama og desisyon kabahin sa pagpamuyo'g pagpanginabuhi, mare.
Dili ta madiskurahe kung ang atong paryente'g mga silingan moingon nga simba-simba ug basa-basa kuno kita'g Bibliya apan maut man gihapon og batasan kay tinuod pod baya-joke!!!
Bitaw, anaa gayud gigrasyahan sa Ginoo nga nahimugsong buotan, migo, apan bisan ang pinakanindot natong batasan--trapo ra sa atubangan sa Diyos.
Subaya ra sa god sa libro sa Isaiah 64:6. So, dili na ta kinahanglan magpakaaron-ingnong tarung ug limpyo kay makasasala tang tanan. Mao nagabasa kita sa Bibliya ug nagaadto'g simbahan aron mahayagan pinaagi sa kamatuoran sa Pulong sa Diyos.
Anyway, dili na mao atong topiko. Naminaw man god ko sa wali sa akong paryenteng pastor nga si Ptr. Arvin Latorino sa Victory Church, ug matud niya nga ang atong panaad (vow/promise) sa tawo sama ra pod daw kini sa panaad nato sa Ginoo.
Dili dautan ang pagpakigsaad. Gani, ang Ginoo mismo daghan kaayo'g mga saad kanato. Pakli sa Bibliya kay dunay kapin singko mil (5,000) promises nakasuwat dinha. Kasagaran kung dili tanan niini adunay kondisyon aron matagamtaman sa gisaaran, igsuon.
Ikaw, naa ba kay gisaaran bisan simple ra kaayo nga matang sama sa magkita mo sa dalan alas tres sa hapon aron mangaon og pan? Simple nga panagsabot apan kung ang usa dili motuman- makasapot, tama?
Matud gihapon sa Bibliya, "mas nindot daw nga dili kita mosaad kumpara sa manaad ta apan ato rang pakyason (Ecclesiastes 5:5) kay nagbugal-bugal ra kuno kita.
Sa inato nga istorya kay tawo lang man kita, "ayaw patugatuga." Kung dili nato mabuhat ang atong gipanaad, sultihan nato'g tarong ang atong mga kasabot kay basi'g makasabot ra pod diay sila nga usahay, dili gayud nato makaya."
Okay ra kaayo mosipyat sa panaad--pagpahibalo lang god kay aron makapangandam ang imong gisaaran kay naa pod na siyay importanteng lihukon nga matang apan iyang gipadaplin kay tungod nasabutan.
Nagkasinabot ba kita? Ang simpleng kasabutan dili nato bugalbugalan kay basi unya kita magabaan. Magtarung kita'g sulti bisan ulaw god, pare, kay pagpakita kini sa atong kasing-kasing nga puno sa "sincerity."
Daghan na kaayo og pamaagi (text, call or padala'g mensahe sa Facebook Messenger) mao walay rason nga dili nato maistorya ang atong kasabot og tarung gawas lang kung aduna kay dili maayong pangutok o plano, igsuon. #getch?