KIBLAWAN, Davao del Sur -- Patay ang usa ka 5-anyos samtang samaron ang laing usa ka 5-anyos human girapido sa gituohang mga bandidong B'laan ang usa ka balay alas 6:35 sa gabii niadtong Huwebes sa Barangay Tacul sa maong lungsod.
Namatay si John John Pandoy, 5, samtang samaron ang usa ka Realyn Guitguit, 5, kinsa kasamtangan nga gitambalan karon sa Gregorio Matas Hospital.
Sa impormasyon gikan kang Police Regional Office (PRO) Davao Region spokesperson Chief Inspector Milgrace Driz nga gipaarakan og bala ang balay ni Alan Pandoy.
Patay diha dayon si John John samtang daling gidala si Realyn
sa ospital kinsa dunay samad sa iyang paa.
Biyernes sa buntag, mipahigayon og follow up investigation ang Kiblawan Municipal Police Station ug ang mga personahe sa Davao del Sur Provincial Police Office ilang naka-engkuwentro ang grupo sa mga bandido, nga miresulta sa pagkapatay sa gituohang bandidong lider sa B'laan nga si Ariel Saluntay.
Atol sa engkuwentro, nasamdan sab ang usa ka sakop sa Citizen Armed Force Geographical Unit.
Narekober sab sa otoridad usa ka pusil ug ang mga personal nga gamit nga gituohang gipanag-iyahan sa mga bandidong B'laan.
Sa kasamtangan, gipahugtan pa sa kapulisan sa Davao del Sur ang
ilang intel monitoring aron di makaatraka ang mga bandido sa komunidad sa mga sibilyan.