PAGSUL-OB og reflectorized vest sa mga drayber ug angkas sa mga motorsiklo di ipamugos sa dakbayan sa Sugbo, apan higpit nga ipatuman ang pagdoble sa administrative penalty batok sa mga makalapas sa balaud sa trapiko.
Si Mayor Tomas Osmeña nisuporta sa ordinansa nga gihimo ni Konsehal Dave Tumulak nga paghimo nga P1,000 nga multa gikan sa orihinal nga P500 sa mga traffic violation, apan gusto niya nga ipausab ang nalatid nga himuong compulsory ang pagsul-ob sa vest.
“You believe in the ordinance then wear your vest. Who’s stopping you? It is not illegal not to wear your reflectorized vest. If you want to make it safe, wear it. It’s not mandatory, you can wear it if you want. I would,” padayag ni Osmeña.
Ang mayor nibutyag nga wa niya mabasa ang kinatibuk-an sa City Ordinance 2491 nga giaprobahan sa City Council ubos sa pagpangamahan ni Konsehal Dave Tumulak.
Nagpasalamat siya sa katawhan nga ningpadangat sa ilang reklamo.
“I am not even aware of that when I signed it. That’s why I have a cellphone. I listen to people,” dugang sa pagbutyag nga nagpusotpusot ang text messages.
“Sunodsunod, grabe. Just tell the people, I’m listening. They’re the boss,” matod sa mayor.
Ang mayor way supak sa paghimo nga P1,000 gikan sa orihinal nga P500 isip multa sa mga driver nga nakalapas sa City Ordinance 801 sama pananglit sa pagpanumbaling sa traffic signs, pagbabag sa pedestrian lanes ug junction box.
Si Tumulak nagkanayon nga ang pagsul-ob og vest dako og ikatabang aron dali makit-an ang mga motorsiklo nga magdagan ug malimitahan ang disgrasya.
Iyang gipasabot nga ang multa nga P3,000 ngadto sa madakpan sa enforcer nga way reflectorized vest di pa mabayran sa mga driver.
Diha pa sila makabayad kon mapasakaan og kaso ug makombikto.
Base sa record niadtong 2017, adunay 12,283 ka vehicular accidents diin dul-an 40 porsiyento niini naglambigit og motorsiklo panahon sa kagabhion, diin 45 ang nakalas.
Laing 2,935 ka mga aksidente gikan Enero hangtod Marso ning tuiga ang nahitabo, siyam niini ang nangamatay.
Si Tumulak niingon nga kon way vest nga masul-ob ang driver bisan kon mapalit ra sa P70, iya kining giawhag sa pagsul-ob og mga jacket, senina nga makit-an panahon sa kagabhion.