BISAN tuod og naka-pirma na siya, apan gibakwi sa ‘kanhi laos nga pulitiko’ ang pag-implementar sa bag-ong amended provision sa Traffic Code of Cebu City nga diin nagmando sa mga motorcycle riders nga magsul-ob og reflectorized vest panahon sa kagabhion. Kini aron makita sa ubang mga motorsista ang nagdagan nga motorsiklo. Usahay gumikan sa kangitngit dili dayon mabantayan ang mga nagsakay og motorsiklo og diha na mahitabo ang disgrasya.
Gisukip kining maong probisyon sa Traffic Code nga diin gipangamahanan ni Konsihal Dave Tumulak og na-aprobahan sa konsiho dili pa lang dugay apil na usab niini ang pagpasaka sa multa sa mga traffic violators gikan sa P500 ngadto sa P1,000. Gipirmahan na kini sa mayor. I-publikar pa kini sa pamantalaan usa ma-implementar.
Mora unta tog dunay aninipot ang atong mga kalsada kay mo-amag man ang maong reflectorized vest. Apan gumikan sa mga reklamo ug negatibong reaksiyon sa publiko pinaagi sa social media, gibakwi sa mayor ang implementasyon niini. Himuon na lang nga voluntary ug dili na compulsary. Buot ipasabot kinsa tong ganahan mosul-ob maayo og kadtong dili, okey lang. Dili nadakpon og multahan.
Maayo kay naminaw sa pulso sa publiko ang ‘kanhi laos nga pulitiko’ ug na-usab ang iyang huna-huna. Dili tantong yabag kay na-usab man ang huna-huna. Ang huna-huna ra man sa boang ang dili ma-usab. Para nako maayo baya unta to kay proteksiyon man to aron kalikayan ang disgrasya kay usahay lagi dili makita ang mga magmotor unya mokalit lang og butho sa imong atubangan.
Apan ania hinuoy silot sa counterflow nga usa ka buwan nga pagka-impound sa mga sakyanan sa mga violators nga para sa uban bug-at ra kaayo, wala man hinoon ma-usab ang iyang huna-huna. Kana unta ang iyang angayan nga usbon o i-libkas. Kana kon maminaw siya sa mga reaksiyon sa uban. (bobbygnalzaro@gmail.com)