HIGH powered nga mga armas ug drugas ang nasakmit sa kapulisan sa dakbayan sa Lapu-Lapu sa managlahing mga operasyon.
Kapin sa P200,000 ug armas ang nakuha gikan sa usa ka tour guide ug kawani sa Lapu-Lapu City Hall atol sa buy-bust operation sa kapulisan sa dakbayan sa Barangay Poblacion niadtong Biyernes sa hapon.
Ang kawani sa city hall nadestino pa sa buhatan sa mayor sa dakbayan.
Ang mga dinakpan mao sila si April Cabarse, alyas, Ape, 28, tour guide nga taga San Vicente, Olango Island sa dakbayan samtang ang kuyog niini nga nagsilbi sa mayor’s office mao si Jonamar Alcover, alyas Amar, 30, taga Sitio Kabatuan, Barangay Pajac.
Nasuta ning mantalaan nga si Amar, kinsa maoy subject sa operasyon, napalitan pa og pistola sa poseur buyer nga pulis nga si SPO1 Artchel C. Tero.
Usa ka kalibre .45 nga pistola nga may duha ka mga bala ang napalit ni Tero gikan kang Amar.
Samtang ni Ape nasikop sab sa kapulisan human napalitan og usa ka pakete nga shabu ni PO2 Junell Mayola.
Upat ka medium ug 36 ka gagmayng pakete sa gituohang shabu ang nakuha gikan ni Ape inubanan sa buy-bust money, .38 caliber revolver, pitaka ug P1,220 nga kinitaan.
Moabot ngadto sa 17.6 gramos ang timbang sa gituohang shabu gikan ni Ape nga may Dangerous Drugs Board value nga P207,680.
Tulo ka kalibre .45 nga armas nga may tagduha ka mga bala ang nakuha gikan ni Amar.
Gawas niini, usa ka KG9 submachine gun nga may 9mm nga mga bala ug Ingram nga may unom ka mga bala ang nakuha sa kapulisan gikan niya.
Ang mga suspek kinsa kasamtangang gibalhug sa detention cell sa dakbayan gikatakdang mag-atubang og kasong may kalambigitan sa paghupot ug pagpamaligya og armas ug drugas.