PATAY ang usa ka inahan human aksidente nga napusilan sa iyang anak nga usa ka police trainee alas 9 sa gabii niadtong Sabado, April 7, didto sa Purok 1, Barangay San Roque, New Corella.
Subay sa impormasyon gikan kang Police Regional Office (PRO) Davao Region spokesperson Chief Inspector Milgrace Cajez Driz, nailhan ang suspek nga si Police Officer (PO) 1 Emmanuel Melana Dumapig, usa ka police trainee ubos sa Field Training Program (FTP).
Nasayran nga gisulayan lang og kasa dayon gikablit sa suspek ang iyang pusil apan kalit kining mibuto tungod kay wa siya masayod nga naa na diay bala nga naka-load sa chamber sa pusil.
Maayong pagkaigo sa salamin apan milusot padung sa ilang kuwarto diin naa sa sulod ang inahan nga si Emma Melana Dumapig kinsa naigo sa iyang suwang.
Gidali pagdala sa Bishop Joseph Reagan Hospital sa Tagum City ang biktima apan gideklara kining dead on arrival sa mga doktor.
Hinuon, ang suspek daling nagpakustodiya sa kapulisan sa New Corella Municipal Police Station diin gihikay ang kaso batok kaniya.