NIADTONG miaging Pebrero 10, gihinganlan ni Presidente Rodrigo Duterte ang Boracay nga usa ka “cesspool,” usa ka dakong biawan o pundohanan sa hugaw sa tawo. Iyang gihatagan ang Boracay og unom ka buwan sa paglimpyo sa maong isla, kay kon di, iya kining pasirad-an.
Gimanduan usab sa Presidente si Secretary Roy Cimatu sa Department of Environment and Natural Resources (DENR) sa pagguba ug pagbungkag sa tanang mga illegal structures sa maong tourist destination nga nabantog sa maputi nga bas sa kabaybayonan ug asul ug tin-aw nga kadagatan.
Sa miaging tuig, ang Boracay napili nga nag-unang island tourist destination sa tibuok kalibotan sa survey nga gihimo sa international travel magazine Condé Nast Traveler sa mga tigbasa niini. Ikaduha ang Sugbo ug ikatulo ang Palawan sa survey sa maong magazine.
***
Gihatagan unta ang Boracay sa pangulo og unom ka buwan sukad sa Pebrero 10 sa pagpanglimpyo sa maong isla. Apan niadtong April 4, si Presidente Duterte mimando nga sirad-an ang entiro isla sa Boracay sugod karong Abril 26. Molungtad kini hangtod sa Oktubre 25.
Ang tumong niini mao ang “total clean-up sa maong isla. Subay kini sa rekomendasyon sa inter-agency task force sa Boracay nga gilangkuban sa Department of Environment and Natural Resources, Department of Tourism, ug Department of Interior and Local Government.
Samtang sirado pa ang maong isla alang sa rehabilitasyon, ang gobyerno maoy moabaga sa libo ka libong mga trabahante nga temporaryong maundang sa ilang mga trabaho. Duna pay laeaw nga ideklarar sa pangulo ang usa ka state of calamity aron katabangan kadtong temporaryong mawad-an sa ilang mga trabaho.
***
Adunay mokabat sa duha ka milyon ka mga turista nga mibisita sa Boracay sa miaging tuig. Sa pagsira sa maong isla, ang mga turista nga moadto unta sa Boracay hayan mga mobalhin ug mohugpa sa ubang mga isla sama sa Sugbo ug sa Palawan. Apan di kaha mosunod ang Surgbo sa nahitabo sa Boracay? Mao kini ang gikabalak-an ni Cebu City Mayor Tomas Osmeña