Roldan: Hinabing pangkalinaw nabuhi

NIADTONG Marso 29, gibalita nga 10 ka ekipong pangkonstruksyon ang gisunog sa Callawa ug uban pang hilit nga barangay sa dakbayan.

Subay sa balita, hinimoan daw kini sa rebeldeng grupong Communist Party of the Philippines-New People's Army (CPP-NPA).

Ang maong petsa bililhon sa CPP-NPA kay niatol kini sa ika-49 nga kasumaran sa katukuran sa NPA, ang armadong puwersa sa CPP nga gitawag nga teroristang grupo sa kasamtangang gobyerno ni PRody Duterte.

Wala tingali nihatag og "share" sa mga rebelde ang mga kontraktor sa dalan didtong dapita mao nga napaig ang ilang mga dump truck, backhoe ug uban pang ekipo.

Mahinumdoman nga gibaharan ni PRody ang mga negusyante nga anaa sa kabanikanhan nga dili mohatag og buhis o "tax" sa mga rebelde kay maapil sila sa iyang kasuko.

Puohon daw sa gobyerno ang CPP-NPA nga naglusad og pinakadugay nga Maoist-Leninist revolution sa kasaysayan sa kalibutan.

Naobertikan na sa CPP-NPA ang Fuerzas Armadas Revolucionarias de Colombia (FARC).

Gani anaay petisyon karon ang Solicitor General sa Korte Suprema nga hingpit nang ilhong terorista ang CPP-NPA nga naghatag og sakit sa ulo sa presidente, Armed Forces of the Philippines ug Philippine National Police.

Sa pagkatinuod, hapit na ako mawad-i og paglaum nga madayon pa ang hinabing pangkalinaw sa kasamtangang administrasyon.

Gawas sa pagbinatoay og mahait nga pulong kang Jose Maria Sison nga kanhi tsirman sa CPP, nibahad sab si PRody nga pangprisohon pagbalik ang mga sakop ug consultants sa peace panel sa han-ay sa CPP.

Gipadayon ang mga military operation sa kabukiran samtang nagmando sab ang lideres sa CPP nga anaa sa Utrecht, Netherlands nga mopahigayon og susamang operasyon batok kanila.

Ang nahitabong pagpangsunog sa ekipo sa Davao paagi lamang nga mapakita sa kagamhanan nga anaa pa sila sa palibot, kusgan ug andam sa bahug-bahog kung gikinahanglan.

Mora'g gusto nilang isulti sa pangulo nga nagdamgo lang kini nga nagmata nga mapuo sila sa pipila ka tuig lamang.

Hangtud karon, wa man gani nila mapuo ang Maute Group, Abu Sayaff, BIFF ug ISIS nga hasta rang gamaya.

Busa nituo gihapon ko nga sa kaulahian, modeklara gihapon ang pangulo og bag-ong hinabing pangkalinaw sa CPP-NPA.

Ug tuod man, mora'g nadungog ang pag-ampo sa mga peace advocates ilabi na ang 60 ka mga kongresista nga nagpadala og apila ngadto sa pangulo nga ibalik pag-usab ang hinabing pangkalinaw.

Sa usa ka pakigpulong ni PRody didto sa Mindoro nga gituohang balwarte sa CPP-NPA, iyang gibutyag ang posibilidad nga mobalik pag-usab ang peace talks.

Hinuon adunay kondisyon ang pangulo sa pagbalik sa peace talks. Una ang dili pagmugna og coalition government. Ang ikaduha ang paghunong sa taxation sa mga negusyante sa kabanikan-an, ug ang ikatulo kay ang pagdeklara og unilateral ceasefire.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph