NASIGURO ko nga daghan na ang nakabantay sa nagkadaghang mga tigsuporta karon ni Presidente Rodrigo Duterte nga nagbutang og profile pic sa ilang Facebook nga nagsangyaw sa ilang pagsuporta sab kang Cabinet Secretary Jun Evasco.
Reaksyon kini sa mga opinyon nga nagbasol kaniya nga hinungdan sa giingong kakulang karon sa bugas gikan sa National Food Authority (NFA).
Gibasol ni NFA Administrator Jason Aquino si Evasco kay kuno wala motugot nga mag-import dayon og bugas.
Matod pa, wa motuman kuno si CabSec Evasco sa mando ni Presidente Duterte nga mo-import dayon og bugas aron masulbad ang kakulang ginamit ang government-to-government (G2G) mode of importation.
Apan sayop man gud ang maong pangangkon kay wa man moingon ang presidente nga mag-G2G gyud. Gawas pa, niingon kini nga ang mga gimbut-an sa NFAC mao ang sundon ug dili na angay motingog si Aquino kay mao hinuon kini ang naglawgaw sa maong isyo.Nganong di man maayo ang G2G?
Kay kini ang naandang paagi kaniadtong wala pa ang administrasyon ni Presidente Duterte sa pagp-import og bugas kun pagpalit og bugas gikan sa gawas sa nasud labi na gikan sa Vietnam, Thailand, ug China.
Mao kini ang naandang paagi nga grabi niburot ang mga opisyal sa NFA ug ang ilang kumplot nga rice cartel tungod sa kurapsyon.
Sa atong nadunggan gikan sa atong mga tinubdan, mohatag og dakong rebate ang mga kagamhanan sa gawas ug ang naadunahan mao ang mga opisyal sa NFA.
Gawas pa, kinahanglang mopagawas og pundo ang kagamhanan nga pwedeng magamit sa NFA sa pagpalit sa harvest sa atong mga mag-uuma.
Sa akong nasabtan, mas giduso sa NFAC ang paagi nga government to private importation kay moagi kini og bidding process unya ang mga pribadong kompanya ang mopaguwa sa ilang kaugalingong kwarta isip investment.
Subay kini sa paagi nga ginganlan sab og MAV o maximum access volume.
Dugang pa, ang pagpapalapad sa kadaghanon sa mga negusyanteng mosalmot sa programa makaguba man sa rice cartel nga gustong mo-monopolyo sa rice industry sa nasud.
Atong nasabtan nga gusto ni NFA administrator Aquino nga mobalik sa maong sistema nga, matod pa ni CabSec Evasco, prone to corruption.
Sa miaging tuig, naninguha kini si Aquino nga malawgaw ang MAV importation. Karon, iyang gikutaw ang senaryo nga NFA rice shortage aron mapugos ang kagamhanan sa pagduso anang G2G.
Kay daghan mga tigsuporta ni Duterte nga nakaapas na sa tuyo nilang Aquino, nidaghan an sab ang niduyog sa kampanya online nga nanawagan nga suportahan si CabSec Evasco.
Di sab ko mahibulong kini moresulta unya sa panawagan nga taktakon si Aquino.
(@anol_cebu sa Twitter)