TINUOD gyud ning gi-ingon nga sa ‘pulitika walay permanenteng kaaway o higala. Ang permanente mao lang ang personal nga interest sa mga pulitiko.’ Daghang mga kaalyado sa pulitika kaniadto apan karon mortal nga kaaway na. Sama sa nahitabo nilang ‘kanhi laos nga pulitiko’ ug kanhi Mayor Mike Rama. Kaalyado sila kaniadto apan karon mortal na silang kaaway. Sila Rama ug Vice Mayor Edgardo Labella, kaalyado pa karon apan posible usab kini magka-engkuwentro sa sunod tuig nga eleksiyon kon mo-insister gyud si Rama nga magpapili. Si Labella na maoy gituboy karon sa partido sa administrasyon, PDP-Laban, pagka-mayor sa sunod tuig nga eleksiyon.
Sa dakbayan sa Mandaue, matod pa mismo ni Mayor Luigi Quisumbing nga nagka-uliay na ang maayong kabubut-on nila ug sa mga Quano. Sila si Luigi ug Lollipop Quano Dizon maoy nagka-atbang sa pagka-mayor niadtong miaging eleksiyon diin higpit ang ilang panagribal. Misaad ang duha ka mga kampo nga magtinabangay sa ilang puwersa sa umaabot nga barangay election. Buot ipasabot usa lang ka kandidato sa barangay ang ilang suportahan.
Kining umaabot nga barangay election, bantayanan pod ni kay posibleng adunay mabuak nga relasyon. Ang akong nadunggan nga posibleng magka-engkuwentro sila si Quiot barangay captain Francis ‘Pangkoy’ Esparis ug Allan ‘Goliat’ Nacorda kon modayon og lansar si Goliat kay matod pa maoy ituboy sa Bando Osmena Pundok Kauswagan (BOPK) ug dili ang kanhi kapitan nga si Jun Ramos.
Nasayod naman kita nga si Pare Pangkoy ug si Goliat kauban sa drama department sa DYHP-RMN. Si Pangkoy mao ang drama production chief, writer ug director. Samtang si Goliat drama talent ug director. Kon magka-engkuwentro sila, posible maguba ang ilang relasyon kay ma-personal man gyud ang kampaniya. Dili na unya makaapil si Goliath sa mga drama ni Pangkoy. Gawas lang kon mohatag siyag ulo sa kanding. Mao man na ang komedya sa mga dramatorgo sa radyo. Aron ang usa ka talent maapil sa casting sa usa ka drama, mohatag siyag ulo sa kanding ngadto sa writer. (bobbygnalzaro@gmail.com)