NAGKAINIT ang isyu sa mga modaganay pagka-barangay kapitan ning hinangat nga eleksyon sa barangay hinungdan nga nagpahimangno si Davao City Mayor Sara Duterte-Carpio nga tumanon ang mga ordinansa sa dakbayan.
Kini ang nahimong pamahayag sa Mayor human migula ang mga isyu nga dunay mga barangay sa Davao City nga nagkainit labi na sa hisgutanang dunay pipila nga nagdala-dala og pusil isip pagpanghadlok sa ilang mga kaatbang.
Sa pakighinabi sa mga tigbalita Lunes, Abril 9, sa Mayor sa City Mayor's Office, gibutyag niini nga di gayud kalimtan ang responsibilidad isip usa ka Dabawenyo ug sundon ang mga ordinansa sa dakbayan.
“I am reminding everybody to follow the ordinances and rules of Davao City, dili tungod kay dunay init nga giingong mga away diha sa barangay elections, makalimtan nalang nato ang atong responsibilidad to be a good residents of Davao City,” ingon sa Mayor.
Subling gipaklaro niini nga dunay election gun ban ug hugot kining ipatuman atol sa among mga takna, ug bisan niining panahona nga gipailawom sa martial law ang Mindanao.
"Ang election dunay gun ban, dapat naay hugot nga pag-implement sa gun ban diri sa atong barangay during sa election period, during the counting of ballots," dugang niya.
Gipahimangnoan sab sa Mayor ang tanan nga di mohimo og mga lakang ug butang sa pagpanikas aron pag-abot sa panahon, di matawag nga “fake barangay captain” human sa piniliay.
"May I remind everybody nga di gyud ta maghuna-huna og panikas, mosuporta sa mga tikasan, because walay dignity sa imong pagdaug kung gikan ra pod sa tikas ang pagdaug... fake barangay captain gihapon ka, at the end," panapos sa Mayor.
Ang schedule sa filing sa Certificate of Candidacy karong umaabot nga Abril 14, 2018 ngadto sa Abril 20, samtang ang campaign period magsugod Mayo 4 hangtud Mayo 12, 2018 diin ang adlaw sa piniliay mahitabo karong Mayo 14, 2018.