KAPIN sa 122,000 ka mga tawo ang gibanabanang nidagasang sa Cebu South Bus Terminal (CSBT) sa Miyerkules Santo hangtod sa Sabado Santo.
Niresulta usab kini sa kapin sa 2,000 ka mga biyahe sa mga bus paingon sa nagkadaiyang destinasyon ug nihipos ang terminal og kapin P300,000.
Sa talaan sa CSBT gikan Miyerkukes Santo hangtud Sabado Santo, niabot og 2,220 ka mga biyahe ang nigikan diha sa terminal paingon sa nagkadaiyang destinasyon.
Sa matag biya sa mga bus sa terminal, mobayad sila og terminal fee nga P150, hinungdan nga moabot sa P333,000 ang kita sa CSBT niini.
Gitug-an sa operations manager sa terminal, Joey Herrera, natala ang labing daghang bus trips sa Holy Week niadtong Miyerkules Santo ug Huwebes Santo, nga anaa sa 689 ug 663.
Labing menus nga biyahe sa bus atol sa tingsakay sa Semana Santa natala sa CSBT management niadtong Biyernes Santo, nga anaa sa 307. Pagka Sabado Santo, niabot og 560 ka bus trips ang ilang natala.
Mapasigarbuhon si Herrera nga walay dagkong kakulian sa terminal, gawas lang sa 8 nga gitabang sa naka-standby nga medical team ug usa ka butane canister nga nasakmit.
Sa sunod nga tingsakay, plano sa CSBT nga pamub-an gikan sa 30 minutos ngadto sa 15 minutos ang pag-standby sa mga bus ug mga drayber sa terminal aron paspas ang biyahe. (AZDL)