PATAY ang usa ka 12 anyos nga babaye samtang samdan ang 17 anyos nga kauban niini sa dihang gipamusil sila atol sa gituohang gang war sa may Sitio Liong, Barangay Alang-alang, dakbayan sa Mandaue kagahapon sa kadlawon.
Ang biktima patay na nga nalandig sa tambalanan sa dihang kini naigo sa iyang ulo atol sa insidente mga alas 3:30 sa kadlawon kagahapon.
Giila ang biktima nga si Tony Recania,taga Riverside, Barangay Looc sa dakbayan.
Ang iyang kaubang 17 anyos giila nga si Jason (tinuod ngan gipugngan), 17, sa Brgy. Mantuyong.
Ang duha ka mga biktima miyembro sa TAG nga fraternity group sa dapit.
Si Chief Inspector Mercy Villaro, public information officer (PIO) sa Mandaue City Police Office (MCPO), nagkanayon nga atol sa hitabo, ang grupo sa mga biktima giingon nga nag-inom sa usa ka sari-sari store sa Sitio Liong, luyo sa dakong mall sa dapit.
Base sa pakisusi sa imbestigador sa maong kaso human nahinabi ang nakasaksi ug higala sa mga biktima nga si Larry Macasero Jr., 22, residente sa dapit, ang laing kaatbang nga Oi Diamond gang naglakawlakaw sa dapit diin nag-inom ang magbarkada ug kalit lang namusil sa way tinong hinungdan.
Naigo sa walang bahin sa ulo si Recania samtang sa tuong paa sab naigo si Jason.
Daling gidala sa Vicente Sotto Memorial Medical Center sa dakbayan sa Sugbo ang mga biktima apan didto na nakabsan sa kinabuhi si Recania.
Nunot sa hitabo, nipatawag og emergency meeting ang deputy chief for administration sa MCPO sa taga Operations, City Intelligence Branch, Investigative and Detective Management Branch ug Police Station 1 aron hisgutan ang maong kaso kagahapon sa hapon.
Paambit ni Villaro nga atol ning pagsuwat, nailhan na ang pagkatawo sa suspek tungod kay kaila ra man kini sa biktima apan nagdumili una og butyag ang MCPO sa pangan sanglit padayon pa ang operasyon sa kapulisan aron masikop.
Si Villaro niingon nga usa sa mga lider-lider sa Oi Diamond gang ang suspek.
Ning pagkutlo ning balita, padayon ang imbestigasyon sa maong kaso ug gipatawag na sab sa kapulisan ang mga ginikanan sa biktima.