GIBALHOG sa selda sa San Pedro Police Station ang usa ka uyoan kinsa nasakpan nga iyang gihimas-himas ang pribadong parte sa lawas sa iyang pag-umangkon sulod sa kuwarto.
Alas 4:30 kagahapon sa kaadlawon, Lunes, gisikop sa kapulisan ang uyoan nga si alyas Rico (bansagon gitago), 49, minyo, nagpuyo sa Barangay 39-D Poblacion, siyudad sa Davao.
Subay sa impormasyon nga nakalap sa Sun.Star SuperBalita, nasayran nga nahinanok si alyas Mikka, 16, sud sa kuwarto sa ilang balay ug giingong mitapad si Rico dayon iyang gihimas ang kalawasan niini.
"Naanad naman gyud ko nga diha siya matulog, pero kung nakatapad ko niya, wala gyud nako siya gihilabtan kay kabalo ko kadugo lang na namo," saysay ni Rico nga nahinabi sa SuperBalita kagahapon didto sa selda sa presinto dos.
Gidugang sa uyoan nga natingala nalang siya nga gipukaw na siya ug gidampot sa pulis aron imbetahon padung sa presinto.
"Natingala nalang ko, kalit ko gidampot, nagduda pod ko kinsa kaha'y misakay sa istorya kay traumatic tan-awon ang bata," dugang niya.
Kagahapon sa buntag, ang Women and Childrens' Protection Desk (WCPD) sa presinto dos naghulat sa nagreklamo aron mahimoan og affidavit alang sa pag-inquest didto sa korte.
Ang maong kaso gigunitan ni Police Officer 1 April Mandi sa WCPD sa San Pedro Police Station.