NAKAKITA ko sa mga litrato sa “MAJAsty” concert ni Maja Salvador sa Mall of Asia niadtong Nov. 12. Intawon kaluoy daghan kaayong bakanteng lingkuranan. Komento pa sa mga Netizen mas daghan pa ang mga langaw ug lamok kaysa mga nanan-aw.
Bisan sa presensya nilang Enrique Gil, Enchong Dee, Paulo Avelino, Piolo Pascual ug Rayver Cruz sa concert, wala kapuno si Maja sa MOA nga adunay seating capacity of 16,000.
Ngano didto man sad siya sa MOA nag-concert? Basig feeling ni Maja ka-level niya si Maine Mendoza? O basig nagtuo siya nga kaya niyang pun-on ang MOA kay kusog ang ilang teleseryeng “Ang Probinsyano.” Si Coco Martin man gud ang gusto sa mga tawo, dili si Maja. Birada pa sa mga Netizen, “Wag maging ambisyosa.”
Apan sa uwahing interbyu, matod ni Maja nga damgo lang gyud kuno niya nga mag ala Beyonce o J-Lo sa dakong arena bisag usa lang kagabii ug natuman ni sa MOA. Haay naku!
Selina sa Slabadu
Maayo pa ang show ni Selina Sevilla sa Slabadu Café and Bistro niadtong Huwebes kay napuno sa mga Cebuano fan atol sa launching sa iyang bag-ong self-titled album.
Tua sad ang mga sakup sa local entertainment press ug mga DJ sa local FM stations. Maayo man gud og PR ang nibarug nga inahan ni Selina sa Sugbo nga si Ma’am Joy Balboa, ang nagduma niadto sa Alpha Records, diin nadiskubre ug nisikat ang kantang “Nilunok ko nang Lahat” ni Selina niadtong tuig 2000.
Ang back-up band ni Selina sa Slabadu ang Fire and Lites (kanhi Firelights band) nga gilangkoban gihapon sa magtiayong bokalista nga Willy ug Bogart. Back-to-back nila ang laing karaang banda ug regular usab sa Slabadu, ang Music Nuts.
Si Selina nia na nagbase sa Cebu isip resident aesthetician sa bag-ong Calayan Medical Group nga anaa mahimutang sa Oakridge Business Park sa AS Fortuna.
Star-Studded
Congrats usab sa Cebuana singer nga si Stephanie kay napuno sad niya ang Mideterranean Hall sa Waterfront Cebu City Hotel niadtong Huwebes, Nov. 12 nga birthday sad diay tong adlawa sa mama ni Step nga si Aida “Angging” Patana.
Grabe ka star-studded ang iyang album launching ug concert, naa ang composer ni Step nga si Vehnee Saturno, ang singer nga si Michael Pangilinan ug ang iyang talent manager ug radio personality nga si Jobert Sucaldito nga puros pa gikan sa Manila.
Naa usab si Anne Fegi, si Mr. Pastillas ug co-finalist niya ug daghan pa. Nag-order pa kuno og dugang albums si Ms. Aida kay na-sold out na ang albums ni Step niadto lang gabhiona. Congrats Step!
Recycled ang gown?
Si Liz Uy nikiha sa Fashion Pulis tungod sa pasangil nga recycled ang gipasul-ob niyang gown ni Maine Mendoza sa Tamang Panahon concert sa Philippine Arena.
Sakto si Liz Uy nga dili recycle ang gown kay wala man to palita ni Kim Chiu ang gown kundi iya tong gisul-ob niadtong 2013 isip usa sa mga modelo sa fashion show sa mga bag-ong disenyo ni Liz Uy.
Apan duna say punto ang Fashion Pulis nga mosaway kay siyempre dako kaayo to nga okasyon sa Eat Bulaga (with record-breaking 41 million tweets!), phenomenal star sa GMA si Maine Mendoza unya ang gown nga gisul-ob nagamit na diay sa laing artista sa karibal pa nilang estasyon.
Grabe ang bashers, intriga ug kumpetisyon karon sa telebisyon, kahibawo gyud unta ana si Liz Uy isip celebrity stylist ug suod nga higala nilang Kris Aquino, Vice Ganda ug uban pang showbiz stars.