DOS anyos nga batang babaye nga nagbakasyon lang sa ilang apohan sa Barangay Adlaon, syudad sa Sugbo, napusilan sa iyang ig-agaw nga 12 anyos sa air gun nga ang bala jolen.
Nahitabo kini alas 2 sa hapon niadtong Lunes sa dihang nag tindog ang biktima nga nagtan-aw sa iyang ig-agaw nga nagduwa-duwa sa homemade gas operated replica.
Kalit nga mibuto ang armas tumong sa walang dughan sa biktima nga giila nga si Clarice Magdadaro, taga lower Tugbongan, lungsod sa Consolacion.
Dali nilang gidala si Magdadaro sa Guba Emergency Hospital apan gideklara kini sa mga manambal nga dead on arrival.
Nasakmit sa mga sakop sa Homicide section pinaagi ni SPO2 Rommel Bancog ang armas samtang ang suspek nga 12 anyos gi turnover usab ngadto sa Women and Children's Protection Desk sa Talamban police station.
Matod ni Bangcog nga milubong sa walang dughan ang marble nga gibala sa replica nga miigo usab sa iyang kasing-kasing.
Giingong magsuon ra ang mga inahan sa 4 ug 12 anyos ug mibakasyon sa ilang apohan dungan usab sa pagpangahoy.
“Nagduwa ning mga bataa diha sulod sa balay sa ilang apohan. Ang ilang giduwaan ang saplong. Mao to kalit lang mi boto tumong sa bata sa left chest,” matod ni Bancog.
Matod sa kabanay ni Magdadaro ug sa 12 anyos nga aksidenteng nakapusil nga niadto sila sa ilang apohan aron mobakasyon apan nakasugat na hinuon og disgrasya.
Matod ni Senior Inspector Arieza Otida, deputy information officer sa Cebu City Police Office, nga nakig-alayon na sila sa City Social Welfare and Services ilabi na nga 12 anyos pa ang nakapusil.
Apan sa nakuha nga kasayuran ni Otida, ang mga ginikanan sa bata di na interesado nga mopasaka og kaso sanglit ilang kadugo ra usab ang naka disgrasya.
“So far, ang ginikanan murag dili na interesado mo file og kaso. The burden right now is with the social welfare, kon unsa ang ilang action to intervene the case,” matod ni Otida sa Superbalita Cebu.
Lakip sa subayon kon kinsa ang manubag sa kamatayon ug kinsa ang tag-iya sa armas.
Sa pagsulat ning balita, ang imbestigador sa Homicide Section wala pa mohatag sa ilang nakuha nga kasayuran kon asa na ang 12 anyos sa pagkakaron.