SUMPAY kini sa atong gihisgutan niadtong miaging Martes kabahin sa pulitika nunot niining nagsingabot nga barangay ug Sangguniang Kabataan (SK) elections karong Mayo 14. Atong gihulagway nga kining pulitika makaguba og relasyon sa mga kaalyado ug bisan sa mga kabanay og silingan. Kining eleksiyon sa barangay personalized kini kay ang mokandidato kaila man sa mga botante, kabanay o silingan. So, nahibalo gyud sila sa personal nga batasan sa usa ka kandidato.
Samtang kanunay nagpahimangno ang Commission on Elections (Comelec) sa mga kandidato nga dili mamulitika kay non-partisan ang barangay elections apan sukwahi sa lagda sa Comelec, ang barangay election usa ka partisan. Buot ipasabot nga ang mga mokandidato sa eleksiyon usa ka pulitiko o gi-kontrolar og mga partido og mga pulitiko.
Si Cebu City Vice Mayor Edgardo Labella, kinsa maoy city chapter chairman sa Barug-PDP Laban, mi-angkon nga naglabad ang ilang ulo karon gumikan kay daghan sa ilang mga kaalyado sa barangay ang mipakita og interes nga molansar sa umaabot nga eleksiyon. Dunay mga supporters ni Labella unya duna man poy mga interesado nga molansar nga mga supporters usab ni kanhi mayor Mike Rama. Kaalyado pa man karon sila si Labella ug Rama. Sama diha sa Apas. Si Kapitan Ramil Ayuman last termer na. Ug iyang gisaaran si Konsehal Allan Majait, kinsa last termer usab, nga maoy iyang suportahan pagkakapitan kay kaalyado sila. Apan mitumaw karon ang isyu nga interesado ang asawa ni Kapitan Ayuman nga si Alfie, nga molansar usab puli sa iyang bana. Aber, unsaon man na karon?
Sa Barangay Kamputhaw diin ang barangay captain mao si Boy Lequigan nga nagpasilong sa landong sa Barug Team Rama. Unya kay molansar man pod si kanhi kapitan ug karon Konsihal Lorenzo “Bong” Basamot nga nagpatuo nga sakop sa PDP-Laban. Kinsa man ang suportahan unya ni Labella? Mao usab kini ang nahitabo sa Bando Osmena Pundok Kauswagan (BOPK) kay daghan interesado. Gubot pa ni sa lukot.
(bobbygnalzaro@gmail.com)