ASAWA sa third placer sa Sinulog 2018 Puppeteer competition nidangop sa buhatan ni Cebu City Mayor Tomas Osmeña aron mangayo og tabang human giingong kuwangan ang premyo nga ilang nadawat.
Si Annalyn Cuyos, asawa sa mananaug nga si Ryan Cuyos, nipadayag sa iyang kasagmuyo dihang P20,000 lamang ang ilang nadawat sa ilang premyo imbes nga P30,000.
Nadawat nila ang premyo niadtong Enero 21, 2018, apan nahibong sila nga dako og kuwang.
Sa dihang ila kining gireklamo sa buhatan sa Sinulog Foundation Incorporated, gisaaran lamang sila nga ihatag ang kantidad nga kuwang sa unang semana sa Pebrero.
Apan hangtod karon wa pa gihapon nila madawat.
Si Mayor Tomas Osmeña nisaad nga kon mapamatud-an nga adunay kalapasan nga nahitabo, andam silang manubag.
“There’s always a chance that we made a mistake, and when we made a mistake, I will assure you, we will pay for our mistakes.” matod ni Osmeña.
Samtang si SFI Executive Director Ricky Ballesteros nipasabot nga ang in-charge sa mga premyo wa mapahibawo nga dunay bag-ong guidelines sa mga premyo karong tuiga.
Si Sinulog Program Director Jess Anthony dela Cruz niingon nga ila nang gihikay ang nahabiling premyo. (RVC & Nova Leah Carbon, CNU Intern)