GIPAHIBAWO sa Bureau of Fisheries and Aquatic Resources (BFAR) nga luwas mokaon og bisan unsa nga klase sa kinhason sa Sugbo.
Kini human giisa ang shellfish bulletin sa kadagatan sa Dauis ug dakbayan sa Tagbilaran sa Bohol, silingan nga isla sa Sugbo.
Matod ni BFAR 7 Regional Director Allan Poquita nga di apektado ang Sugbo sa red tide hinungdan nga luwas ra nga mokaon og kinhason.
Hinuon gipasabot niini nga sagad sa kinhason nga baligya sa merkado, kinuha sa amihanang dapit sa Sugbo ug Bohol diin layo ra ang red tide.
Sa labing uwahi nga shellfish bulletin sa BFAR niadtong Abril 6, gidili ang pagkuha og kinhason sa kadagatan sa Biliran Island, Honda Bar sa Puerto Princesa sa Palawan, kadagatan sa Leyte, Carigara Bay sa Leyte, Lianga Bay sa Surigao del Sur, ug Dauis ug Tagbilaran sa Bohol.
Unang gisaka ang red tide sa Tagbilaran ug sa Dauis, Bohol niadtong Marso 22.
Pasabot ni Poquita nga kinahanglan og local transport permit ang tanang mga isda, kinhason ug uban pa nga gikan sa dagat kon ibiyahe sa laing dapit.
Luwas usab ang mga isda nga gikan sa maong mga dapit.
Kon mokaon ang tawo og kinhason nga apektado sa red tide, mamahimo nga makasinati kini og paglabad sa ulo, pagsakit sa tiyan ug pagsuka-suka. (HBL)