GIBALHOG sa selda sa San Pedro Police Station ang usa ka lalaki kinsa nakuhaan og marijuana sud sa iyang sapatos human nagkarambola kay nasakpan sa uyab nga nakig-date nga laing babaye.
Ang dinakpan mao si Miko (bansagon gipatago), 30, nagpuyo sa Barangay 76-A, Bucana, Davao City.
Subay sa blotter sa San Pedro Police Station, maayong pagkasakop kaniya sa iyang uyab nga grabe ka ka-sweet sa laing babaye didto sa Roxas Avenue.
Wala napugngan sa uyab, iyang giduol ang babaye ug iyang gidumog nga miresulta sa pagdinaganay mao miresponde ang kapulisan nga nagbantay sa dapit.
Dihang gikapkapan na ang suspek ug gihiling ang sapatos niini, nakuha ang usa ka putos nga pinaugang dahon sa marijuana.
Sa pagdala sa presinto sa suspek, mitug-an kini nga mogamit lamang siya sa marijuana aron makadiskarte sa iyang mga uyab nga moabot na sa trese ka mga babaye.
Giangkon sa ssupek nga gidungan niya ang 13 ka babaye sa pakigrelasyon kanila.
Didto sa prisohan, nagsunod-sunod sa pagpangabot ang 13 ka mga babaye kinsa nag-iyahay og patas-anay sa kilay kung magsugat ang ilang mga panan-aw.
Gisulayan og hinabi sa SuperBalita ang suspek kagahapon, apan nagdumili kini paghatag og pahayag mao nga pulis na lamang
ang gihinabi ning tigsuwat.
Kasong pagsupak sa Republic Act 9165 kun Comprehensive Dangerous Drug Act of 2002 ang ipasaka nga kaso sa suspek didto sa korte.