SA usa ka tubaan, nag-estoryahanay ang duha ka mga amigo samtang nagtagay og tuba ug ang ilang topic way lain kon di ang umaabot nga piniliay sa barangay ug sa Sangguniang Kabataan (SK) karong Mayo 14. Pangitaon na ra ba karon ang tuba nga tinuod gyud.
Ilang gihisgotan mao ang mga posibleng modagan sa pagkapitan sa ilang barangay ug ngano nga daghan kaayong gustong mahimong kapitan. Lakip sa ilang gihisgotan mao ang kwalipikasyon nga posibleng mahimong kandidato sa pagkakapitan.
Hangtod nga nahisgotan nila ang usa ka tawo nga gusto gihapong modagan sa pagkakapitan bisan kon maluyahon na. Matod pas usa sa manag-amigo, “Modagan na siya? Maglisod na man gani na siyag lakaw?”
u25cf ● ●
Nindot unta kon ang kadtong mga taas og kwalipikasyon ang mokandidato sa eleksyon sa barangay. Bisan kon si kinsa ang modaog kwalipikado gyud. Apan unsa man ang kwalipikasyon sa kandidato sa pagkakapitan ug konsehal sa barangay?
Sumala pa sa Commission on Elections, kinahanglan siya nga usa ka Filipino citizen, rehistradong botante sa barangay nga adto siya magpapili, nagpuyo siya sa maong barangay sa labing menos usa ka tuig sa di pa ang eleksyon, makamaong mobasa ug mosuwat sa Filipino o kaha sa bisan unsang pinulongan ug labing menos 18 anyos ang edad sa adlaw sa eleksyon.
Basi sa maong mga kwalipikasyon, bisan kadtong maglisod nag lakaw, mahimong modagan sa eleksyon sa barangay. Ang nindot gyud mao kadtong tawo nga moserbisyo ug dunay ikaserbisyo.
u25cf ● ●
Apan dunay mga tawo nga atahado ug nagduha-duha pa kon modagan sa eleksyon sa barangay, ilabi na sa pagkakapitan. Usa na niini ang akong higala nga si Atty. Chris Ruiz sa Barangay Labogon, sa syudad sa Mandaue.
Kagahapon ni-text si Atty. Ruiz kanako kay daghan na kaayo sa iyang mga katagibalangay ang niadto sa ilang panimalay aron kombinsihon siya nga modagan sa pagkakapitan sa Labogon.
Aron di mahisagmuyo ang iyang mga kaubang baryohanon, iyang giingnan nga iya pang hinuktokan ug huna-hunaon kon mosugot ba siya sa hangyo sa katawhan nga modagan siya sa pagkakapitan.
u25cf ● ●
Ang eleksyon sa barangay mahimong pangandam sa mga mayor sa kalungsoran ug mga syudad alang sa piniliay sa lokal nga kagamhanan sa sunod tuig. Ilang mahibaw-an kon pila sa ilang mga supporter ang nidaog sa pagkakapitan.
Di kalikayan nga makagasto ang mga mayor ug mga kongresista sa eleksyon sa barangay bisan pa kon giingon kini nga non-partisan, way pamolitika. Kadtong di gustong makagasto, mohilom og biyahe sa gawas sa nasod atol sa eleksyon.