HINAUT nga kining pagkapili ni Dionne Monsanto nga maoy modala sa papel ni Rayna Bulakna sa umaabot nga Kadaugan sa Mactan maoy sinugdanan nga ang abilidad sa mga Sugbuanong mga artista (bisan wala magbase sa Manila o wa pa mailhi) hatagag bili sa organizers sa bisan unsa nga kalihukan nga sama sa “Kadaugan sa Mactan”.
Si Derick Hubalde ang modala ni Lapulapu samtang si Adrian Luis Alandy maoy Magellan.
Nakasabot ko nga sa niaging katuigan, gikinahanglan ang sikat nga mga artista aron dugokon ang kalihukan sa paghinumdom sa bayanihong pagbuntog ni Lapulapu kang Magellan.
Pero sa gidugayon sa paghimo sa kalihukan nga wa gyud mosipyat nga dugokon sa mga turista (langyaw ug dili), angay na tingali nga ang kalihukan na mismo ang mohaylo sa mga dumuduong nga motan-aw niini ug di na kon kinsa ang modala sa papel ni Lapulapu, Magellan, Bulakna ug uban pa.
Mga panghinaut sa usa ka malampusong pagsaulog sa Kadaugan sa Mactan karong tuiga.
u25cf ● ●
Wa lang damha, ang akong gi-post sa Facebook nga hulagway sa usa ka tarpaulin nga nagpahibalo sa temporaryo nga pagsira sa sandbar sa Sumilon Island makapaukay sa madlang pipol.
Salamat ning mantalaan nga nakamatikod sa pahibalo gikan sa opisina sa mayor nga akong gihulagway isip “oslob’s share in taking care of mother nature.”
Initiative kini sa local government unit ubos ni Mayor Jose Tumulak Jr. aron paglikay nga mahitabo sa lungsod ang giatubang nga pagpasira sa isla sa Boracay. Nakapukaw kini sa kasibot sa ubang mga tawo ug mga ahensya nga may pagpakabana sa kalikupan.
Gani, nidayeg ang Provincial Environment & Natural Resources Office ug gidani ang ubang LGUs nga sundon ang gibuhat sa Oslob.
Dunay mga comments sa akong gi-post nga nanghinaut nga di lang unta ang sandbar sa Sumilon ang limpyohan, hasta usab kuno ang dapit sa mga resort sa mainland ug uban pang mga patigayon nga basin adto sa dagat molabay sa ilang mga solid ug liquid nga mga hugaw.
Hinaut nga tungod ning nahitabo sa Boracay, mas modaghan pa ang magpakabana sa kalikupan kay ang tanan man usab gyud ang maapektohan kon unsa may mahitabo niini.
u25cf ● ●
Mora ra lang og bag-o pa lang nga nakatawa ko sa gamayng bata nga si Nash Aguas nga nihilak kay abi niyag napilde siya sa Star Circle Quest Kids kay ang ngalan man sa babaye nga finalist ang gitawag (pero isip first runner-up diay).
Niadtong Martes, nakita na usab nako si Nash nga usa na ka ulitawo nga naghilak ug nipakita sa kalawom sa iyang pag-arte isip usa sa mga bida sa The Good Son. Nakigtigi siya nila ni Joshua Garcia ug Jerome Ponce sa pag-arte.
Akong malantawan nga kining tulo ang mosunod sa tunob nila ni John Lloyd Cruz, Jericho Rosales ug Piolo Pascual ingon man sa mga beteranong sila si Joel Torre, Christopher de Leon ug Bembol Roco sa natad sa arte.
u25cf ● ●
Morag makalingaw ang sunod nga dalit sa Star Cinema nga “The One That Ghost Away” kay sa TV trailer pa lang, nakaagik-ik ko ug mga higala samtang nagtan-aw niini.
Gisuportahan si Kim Chiu nila ni Ryan Bang ug uban pang mga komedyante sa Abril 18 na kini isalida. Mag-atang ko ani..