BASTA kaon na ang hisgutan, mahiligon kitang mga Pinoy sa lami ug preskong seafood--gikan sa isda, kinhason ngadto sa guso. Kon hilig ka og alimango, bisitaha ang Mr. Crab sa lungsod sa Consolacion, Cebu.
Nagtrending ang maong kan-anan tungod sa ilang gitanyag nga unlimited crabs sa kantidad nga P399! Matod ni Cherry Agosto, store manager sa Mr. Crab, adunay upat ka timpla ang ilang unlimited crabs: garlic (bestseller), sweet and spicy, black pepper ug chili.
Ang P399 alang lang sa steamed crab. Kung ganahan ka og laing timpla, garlic pananglitan, mopuno ka og P50.
Wa pay labot sa P399 ang rice ug drinks.
Gawas sa unlimited alimango, aduna say mga seafood nga gitanyag ang Mr. Crab apan di kini unlimited.
Aduna sab silay solo meal nga gikan sa P159 ug group meals nga P300 pataas. Naa puy combo packs nga gilakipan og nokus, pasayan, kinhason, pork barbecue ug uban pa. Ang combo packs lahi og mga presyo.
Ang seafood ilabi na ang alimango nga giluto sa Mr. Crab naggikan sa fishpond sa mismong tag-iya niini didto sa Mindanao.
Ang unli crabs gitanyag hangtod mahurot ilang stock matag adlaw. Mao na, maayong mosayo mo og adto sa Tambayan sa Lacion Food Park diin nahimutang ang Mr. Crab.
Usahay dali silang mahutdan o wala silay stocks sa unli crabs tungod kay way shipment nunot sa bati nga panahon ug limitado ang harvest sa sizes sa crabs sa ilang fishponds.
Hugot nga gidili ang sharing, way take out ug way sobra-sobra aron di madoble ang charge.
Sukad sa ilang pag-abli, usa ka kustomer ang nakahurot og 25 ka alimango.
Ang Mr. Crab anaa nahimutang sud mismo sa Tambayan sa Lacion Food Park nga nahimutang unahan sa may SM Consolacion kung gikan ka og Mandaue City.
Niabli sa publiko ang kan-anan niadtong Hunyo 22, 2017.
Abli ang Mr. Crab gikan sa alas 4 sa hapon hangtod tungang gabii. Ugma, Abril 14, moabli ang laing branch sa Mr. Crab sa Pardo, Cebu City.