BISAN og P10,000 ra ang kuwang sa bana ni Analyn Cuyos, apan makadawat kini og dugang P10,000 human nimando si Cebu City Mayor Tomas Osmeña nga himuon nang P20,000 ang ihatag niini tungod sa kalangan sa kuwang sa premyo.
Apan si Osmeña wala gihapon masayod unsa’y rason sa pagkalangan sa kuwang sa premyo sa puppeteer winner atol niadtong Sinulog 2018.
Kahinumduman, nidangop si Cuyos kang Osmeña human wala pa mahatag ang kuwang P10,000 sa ilang premyo.
Nasayran nga ang premyo sa ikatulong pwesto sa Puppeteer category P30,000 apan sa ilang nadawat nga cheke P20,000 lang kini maong ilaha kining gipangutana sa Sinulog Foundation Inc. apan matod pa sulod sa dul-an tulo ka buwan nga pag-follow up giingong gisigihan lang sila og pasalig nga maoy rason nga nagpatabang na siya sa Kagamhanan sa siyudad.
Dugang sa Mayor sa note nga iyang gipadala kang Engr. Pericles Dakay sa SFI nga ang winner nga naalkanse og P10,000 hatagan og ‘suffering compensation’ nga P10,000.
Pasabot niini, dili lang ang kuwang nga P10,000 sa premyo ang madawat ni Cuyos dugangan pa kini og laing P10,000 sa Mayor sa kinatibuk-an moabot sa P20,000 ang madawat ni Cuyos.
“I don’t like to hurt people’s feelings anyway you can see we made so much money so sige nalang, they have all this participants have made the Sinulog successful we don’t want to have a reputation where there’s favoritism, cheating the princes”, si Osmeña nagkanayon.
Ang pundo sa monetary compensation adto kuhaon sa pundo sa SFI.
Si SFI Executive Director Ricky Ballesteros niingon nga ang in-charge sa prizes nga karaang guidelines ang ilang nagamit ug dili kadtong bag-o. Sa pagkakaron gilihok na sa City Accounting Office ang pag-proseso aron ma-release ang kuwang nga P10,000 ug dugang P10,000. (HBL)