MOABOT sa P12 milyones ang sobra sa Sinulog Foundation, Inc. (SFI) atol sa Sinulog karong tuiga.
Ang maong mga transaksyon sugod sa Disyembre 2017 hangtod Pebrero 15, 2018.
Matod ni Cebu City Mayor Tomas Osmeña nga mapunta ra gihapon sa SFI ang nahabilin nga kwarta aron magamit kini sunod tuig atol na usab sa laing Sinulog Festival.
Base sa gihatag nga dokumento ni Osmeña sa mga tigbalita moabot sa P39.5 milyones ang nadawat sa SFI nga hinabang sa kapyistahan.
Moabot sa P24.1 milyon ang cash niini samtang P15.4 ang dili cash.
Base usab sa mga kalihokan sa Sinulog 2018, niabot lang sa P27.4 milyon ang nagasto diin P12 milyones niini cash ug P15.4 mao ang non-cash.
“Thats for sinulog, thats for next year,” si Osmeña nagkanayon.
Dugang niini nga nagpakita lang nga aduna’y korupsyon nga nahitabo sa mga nangagi nga tuig tungod kay minus ang sobra niini.
Itandi sa 2018, ang 2017 nakadawat og hinabang nga P28.1 milyon diin P22.7 ang cash ug P5.3 ang non-cash.
Samtang ang nagasto niabot sa P25 milyon diin P19.6 milyon ang cash niini ug P5.3 ang non-cash.
Gibutyag usab sa mayor nga gipang-ilisan na nila ang mga tawo sa SFI hilabi na sa financial ug soliciation niini.
Dugang usab sa Mayor nga gipaubos na karon og ebalwasyon si SFI executive director Ricky Ballesteros.
Hinuon nagkanayon ang mayor nga mamahimo sila nga mokuha og accounting firm nga mosusi sa mga nangbalay ug kasamtangan nga dagan sa hinabang sa maong festival.
Usa sa focus sa mayor karon ang 2021 nga Sinulog diin mao kini ang ika-500 tuig sa pagkakaplag sa balaang bata. (HBL)