UPAT ka mga traffic enforcer gikan sa Ciy Traffic Enforment Service (CTMS) ug usa ka traffic police gikan sa Lapu-Lapu City Police Office (LLCPO) gipasidunggan ni Mayor Paz Radaza human makadakop og mga opsiyal ug kawani sa city hall nga nilapas sa balaod trapiko.
Mismong si Radaza ang nitunol sa ganting cash nga gikan pa sa iyang personal nga bulsa niadtong Miyerkules.
“Ang kaning award para ni madisplina ang mga nadakpan kay dakupon man gyud sa atong enforcer. It’s not nga ato sila i-penalize, ang ato ana nga madispilina sila (mga nadakpan),” ni Radaza sa mga tigbalita.
Ang mga gipasidungan sa mayor mao sila si PO3 Jonathan Hinlayagan, traffic police, mga kawani sa CTMS ngac sila si Owen Malingin, Weinchel Lumongsud, Airo Ceniza, ug Carlito Pagobo.
Si Hinlayagan maoy nakadawat sa labing dakong ganti human makadakop og tulo ka job-order nga mga kawani sa kagamhanan, usa ka department head ug usa ka barangay konsehal.
Moabot ngato sa P16,000 ang nadawat ni Hinlayagan sanglit P5,000 man ang ganti sa madakpan nga opisyal sa barangay, P3,000 alang sa department head ug P2,000 sa kawani sa city hall.
“Nipatuman lang gyud ko sa balaud. Trabaho man namo nga motabang sa city government sa pagpa-implement sa traffic rules,” ni Hinlayagan sa mga tigbalita.
Paambit niya nga adunay mga nihangyo nga kawani sa kalapasan niini apan nahibaw naman sila sa ilang sayop maong wa niya kini pasaylua.
“Hangyo lang nako sa uban nga wa madakpi nga likay lang gyud ta. Pasalamat sad ko sa uban nga nituman gyud (sa traffic rules),” dugang niini.
Ang mga nasikop ni Hinlayagan nahitabo gikan sa Marso 15-Marso 21 ug sagad sa mga kalapasan mao nga wa kini helmet, way OR/CR, defective headlight, way taillight, side mirror ug uban pa.
Sila si Malingin, Ceniza ug Pagobo nakadawat og tag P2,000 samtang P3,000 ang nadawat ni Lumongsod human kini makadakop og department head.
Si Padaza nagkanayon nga ang lima ka napasidunggan mao na ang ikalimang batch nga nahatagan og ganti niya.
Paambit niya nga moabot na sa 23 ka mga kawani sa city hall, department head, ug opisyal ang nasikop sa mga enfocer/traffic police sa dakbayan nga nilapas sa balaod sa trapiko.