DILI ebidensya ang pulso sa katawhan ug ang kasuko sa publiko sa subling pag-imbestigar sa Department of Justice sa reklamo nga gipasaka sa kapulisan batok sa magpapatigayon nga si Peter Lim ug ubang personalidad nga gidudahang nalambigit sa gidili nga drugas.
Mao kini ang gisulti sa mga abogado ni Lim sa ilang motion for reconsideration nga nadawat sa DOJ niadtong Lunes.
“Due process is the rule of law. It should not be overtaken by a mob-rule, as what happened in this case. After all, ours is a ‘government of laws and not of men,” tipik sa motion ni Lim nga gimantala sa GMA News Online.
Sa mosyon, gusto sa Sugbuanong negosyante pinaagi sa iyang mga abogado nga ipahunong ang reinvestigation sa DOJ sa reklamo nga gisang-at sa Criminal Investigation and Detection Group (CIDG) batok niya, self-confessed drug dealer Kerwin Espino ug ubang gidudahang drug personalities.
Matod ni Magilyn Loja, usa sa mga abogado ni Lim, nga paglapas kini sa katungod sa due process sa ilang kliyente.
“We are concerned about violation of our client’s rights to due process and speedy disposition of cases. In fact those are major grounds that we raised in our motion for reconsideration,” pamahayag ni Loja sa pagsugod sa reinvestigation niadtong Huwebes.
Sila nisang-at usab og mosyon nga naghangyo sa mga prosecutor nga mopahigayon og buwag nga pakisusi ug paspas nga resolusyon sa mga kaso.
Ang DOJ adunay bag-ong giumol nga panel of prosecutors nga maoy mo-review sa pagkabasura sa reklamo nga giduso sa Philippine National Police-CIDG batok nila ni Lim, Espinosa ug ubang gidudahang drug personalities nga nisangko sa pag-resign sa katungdanan ni kanhi Justice Secretary Vitaliano Aguirre II.
Kini gilangkuban nila ni Senior Assistant State Prosecutor Juan Pedro Navera, Assistant State Prosecutor Anna Norren Devanadera ug Prosecution Attorney Herbert Calvin Abugan.
Ang mosyon ni Lim aksyonan pa ni Menardo Guevarra, ang bag-ong gitudlo ni Presidente Rodrigo Duterte nga kalihim sa DOJ.
Si Navera nimando sa CIDG sa pagtubag sa mosyon ni Lim sa Abril 17 ug ang mga abogado sa negosyante sa pagtubag sa komento sa Abril 22.
Gihatagan sa panel ang CIDG hangtod sa Abril 30 aron moduso og dugang mga ebidensya ug testigo sa reklamo batok sa gidudahang mga drug personality.
Sa report sa TV 5, ang Office of the Solicitor General nangayo og palugit aron makaduso og dugang ebidensya sama sa pag-angkon ni Espinosa sa Senado nga siya nalambigit sa negosyo pagpamaligya og gidili nga drugas.
“To show that we really have a case, hindi kukunin ito ng OSG if our case is dwindling, OSG is OSG, hindi ‘yan basta papasok sa isang case,” pahayag ni Supt. Alfonso Oraos, hepe sa legal counsel sa CIDG.