SA 1,431 tanan ka mga empleyado sa pito ka mga local government unit nga napaubos sa kinalit nga drug test sa Cebu Provincial Anti-Drug Abuse Office (Cpadao) gikan sa Enero 22 hangtod sa Abril 5 ning tuiga, 8 niini ang nagpositibo sa paggamit og gidili nga drugas.
Samtang, sa 1,128 ka mga pulis nga gi-drug test usab sa Cpadao, duha niini ang nagpositibo, usa sa Compostela Police Station ug usa ka tourist police sa lungsod sa Badian.
Ang tourist police maoy labing uwahi nga nagpositibo sa random drug test sa Cpadao niadtong Abril 2.
Kagahapon, laing kinalit nga drug test ang gihimo niini sa 310 ka mga empleyado sa munisipyo sa San Remigio, amihanang Sugbo diin usa ka job order nga empleyado ang nagpositibo sa paggamit og gidili nga drugas.
Ang mga LGU nga napaubos sa drug test mao ang siyudad sa Naga, 194 ka mga partisipante; 91 sa Samboan, 82 sa Malabuyoc, 266 sa Ronda, 311 sa Dumanjug diin duha ang nagpositibo, 291 sa San Francisco ug 196 sa Liloan diin lima ang nagpositibo.
Matod ni Ivy Durano-Meca, pangu sa Cpadao, nga kasagaran sa mga nagpositibo kay mga job order nga empleyado.
Siya nipasabot nga j.o. kasagaran kay kini ang labing daghan nga populasyon sa mga LGU kon itandi sa mga regular ug casual.
Si Meca niingon nga human sila makapahigayon og drug test, ang resulta ilang ipadala sa local chief executive diin kini na ang mopatuman sa mga sanction nga nalatid sa Civil Service Commission.
Ang uban sa nagpositibo kay na-dismiss sa trabaho, dunay uban wala na nibalik sa trabaho. (SCG)