MANAWAT na og balik ang Cebu City Government og mga scholar human sa duha ka tuig nga temporaryong pagkahunong.
Ang pangdawaton mao ang ning-graduate sa mga public high school sa dakbayan sa Sugbo.
Si Konsehal Joy Young, chairman sa committee on education, nagkanayon nga magsugod ang aptitude test sa libuan ka mga graduate sa K-12 karong Abril 23 hangtod Mayo 7.
“I need your help to announce nga naa gihapon ang scholarship program sa city kay nahunong man ta og duha ka tuig kay walay graduates ug walay scholars,” matod ni Young, kinsa nihatag og katin-awan gumikan sa mga text nga iyang nadawat.
Karong tuiga, ang City Government nigahin og P202 milyones alang sa graduate sa K-12 diin sa kasamtangan, ang City Hall adunay 7,250 scholars nga nagtungha sa kapin 20 ka eskwelahan nga akreditado sa Siyudad.
Gibanabana nga maobot ngadto sa 3,106 ka mga graduate sa K-12 ang gipangandaman ug gikatakdang mopaubos sa aptitude test aron mahibaw-an kon unsa nga matang sa kurso ang ilang kuhaon inig abot nila sa kolehiyo.
Gipahibawo ni Young nga gipahibawo na ang mga school principal sa venue ug petsa kon kanus-a mopaubos sa eksaminasyon ang ilang mga tinun-an nga pagadumalaon sa private testing center.
Makabalik og eskwela
Gipahibawo ni Young nga karong tuiga, ang City Scholarship committee modawat og mga graduate sa high school gikan sa 2010 paubos ug mahimo usab makabalik og eskwela ang kadtong kanhi mga scholars nga wala makatiwas og eskwela kinsa gustong mo-ekswela sa kolehiyo.
Matod sa chairman sa committee on education nga iyang gi-amend ang guidelines sa city scholarship aron mahatagan og second chance ang maong mga graduate nga napakyas gumikan sa kalisod.
Inay 2010 graduates ang makapahimulos sa city scholarship program, gius-osan kini ni Young ug iyang gipadayag nga bisan kadtong ni-graduate sa 1980’s mahimo nga maka-eskwela uban sa pag-recognize sa ilang kanhi tunghaan.
Gipasigarbo usab sa konsehal nga way graduate nga mahikawan sa pagtungha sanglit silang tanan maka-eskwela apan ang kurso magdepende sa resutla sa ilang aptitude test.
Ang City Goverment mohatag og P10,000 sa matrikula matag semester, P1,000 sa school supplies, ug laing P1,000 matag buwan ngadto sa mga scholars gikan sa bukid.