HELLO, everybody! Summer na gayud mao dili na kaayo sayo moaginod ang atong mga kabataan apan padayon sa pagpamugas ang mga ginikanan kay alangan - mangaon man gihapon kitang tanan.
Hayahay alang sa mga estudyante ug mga nagpa-eskuwela ang summer apan ting-pait ni sa uban natong kaigsuon diin direktang apektado ang ilang mga panginabuhian. Sama na lamang sa mga drayber ug mamaligyaay'g pagkaon ug school supplies nga ang kinitaan kasagaran gikan sa mga nagtungha sa eskuwelahan.
Anyway, temporaryo man lamang kini apan reyalidad sa atong mga tagsa-tagsa ka mga kinibuhi. "Weather-weather" lang, igsuon, usahay hayahay, aduna poy higayon nga pit-os gamay. Okey ra na, ang labaw'ng importante- buhi pa gihapon kita, mao makapadayon pagpanginabuhi.
Hisgot ta sa makadiyot aning "kuwarta" kun money kay medyo dili kini lalim padaghanon, mare. Ang mga empleyado (dili tanan) inig dawat sa suweldo mag-ingles dayon, migo, kay moingon man og, "short." Ambot pod ning suweldo no, kay nagataas man apan dili gayud nagapanghinobra alang sa kadaghanan sa atoa. Ka-relate ka? Makakanta hinuon ta ani sa theme song sa salida nga, "The Greatest Showman" kay, "never been enough" ang linya.
Maayo man kadtong gihimugso sa kalibutan nga datu nang daan kay dawat-limpyo ra sila sa mga katigayunan. Apan sa mga yanong tawo sama nato, pinatuloan gayud og singot (apil sip-on usahay) ang pag-angkon og salapi sa bisan unsang pamaagi. Anaa ang tumang pagpaningkamot (ug paningtiil) aron lamang makakuha'g pundo alang sa pang adlaw-adlaw nga igasto, tama ko?
Way problema sa atong mga kinitaan kay kita man ang naningkamot niana, inahan. Kung short, awww- aguwanta sa gamay kay puhon modako ra lagi na. Importante kaayo ang kuwarta kay matag-lihok nato, higala, daw manginahanglan ta'g panggasto, di ba?
Ang uban gani mas nahigugma sa kuwarta kay pinakatinipigan kini sa dughan nila labaw pa sa ilang kapamilya. Nasubo ko nga namati sa akong paryente nga gikamang ang bahin, gani wala gipahibalo mismo sa iyang igsuon ug bayaw nga nabaligya na ang lote sa ilang ginikanan. Intawon, akong paryente nasakitan ilabi na nga ang iyang igsuon, pirmi pod sa simbahan.
Ang relasyon nato sa kuwarta maoy salamin sa relasyon pod nato sa pamilya o mga higala. Gani ang Bibliya (Mateo 6:21) nagkanayon nga kung asa imong bahandi; didto pod ang imong kasingkasing.
Ang pangutana, unsa man ang imong bahandi, ang nindot nga relasyon o kuwarta? Kung relasyon- dili nimo limbungan ang imong igsuon ug ang ubang tawo, aron lang malipay ka. Sabagay, kung imong angkunon tanang bahin- makapalit ka og nindot nga sakyanan, balay ug uban pang kabtangan apil na ang habhab nga lamian.
Kung kuwarta ang atong hinigugma, padaplin gayud ang relasyon sa pamilya o higala. Siyempre, usik man alang nimo nga gastuhon kini sa ubang tawo. Naa gani koy kaila nga sa sobrang paghigugma sa kuwarta, gitipid bisan ang panud-an niya mao to namatay sa sakit sa kidney kay pirmi bulad ug ginamus ang sud-an, mare, bisan milyonarya kini.
Bitaw, sa akong bahin, okey lang magdinalo basta imong kaugalingong kuwarta. Wala man seguroy makapugos nato kung dili gayud ta manghatag, no? Lahi na ang istorya kung hilabtan o manlimbong ka sa kuwarta sa uban ilabi na sa imong igsuon, dili ba? Kung malikayan nimo ang ubang tawo nga gitikasan nimo sa panalapi, ang igsuon- DILI kay kadugo nimo unya magkita'g magkuyog pa gayud mo sa daghang okasyon, migo.
Makaharung pa diay kita sa mata sa tawo nga atong gitikasan? In fairness, hawod ani ang uban. Dili gayud kini maayo, higala. Mahadlok kita sa pagpaningil sa kahigayunan kay pinilu-pilo pod baya ang kinubrahan (gabaan).
Ang kuwarta- mahurot, ang relasyon sa manag-pamilya ug higala- puwedeng forever mao dili ta manlinglang kay ato gayud ning pagamahayan.