MOKABAT P1 million ang kantidad sa mga nakumpiska nga mga kahoy sa mga bansohan sa Davao del Norte ug sa Toril, Davao City.
Adlaw nga Huwebes mokabat sa 1,831.53 board feet nga kahoy ang nakumpiska sa Davao del Norte Provincial Police Office sa ilang hugot nga kampanya batok illegal logging.
Mga kahoy naggikan sa Purok 8, Brgy. Buan, Asuncion; Purok 18, Brgy. Mesaoy, New Corella; Purok 9B, Brgy. Magatos, Asuncion; Purok 4-B, Brgy. Sto. Niño, Talaingod; ug sa Purok 2. Brgy. Tiburcia, Kapalong.
"Usa ni siya sa atong mga mandato nga kinahanglan atong protektahan ang atong kinaiyahan, maong usa ni siya nga atong gi-intensify ang pagpanakop sa malapason ning maong balaod," sulti ni Police Regional Office (PRO) spokesperson Chief Inspector Milgrace Cajes Driz.
Sa maong adlaw sab, nakumpiska sa Toril Police Station ang mga ilegal nga bansohan diin nakumpiska ang mga gipanggabas nga kahoy nga maoy usa sa mga gidili sa Department of Environment and Natural Resources (DENR).
Subay sa report gikan sa PRO, gipangkustodiya sa Toril PNP ang unom ka mga tawo human sila maaktuhan sa mga pulis sa giingong ilegal nga bansohan.
Mga nahisgutan mao sila Sotero Ortiga Gimang, taga New Lizada Village, Brgy. Lizada; Laurenciano Apidaw Linsag, nagpuyo sa De Guzman Street; Crispin Sia Simon, taga Saavedra Street; Julius Manera Cadangan, nagpuyo sa Brgy. Daliao; Rogelio Carcalias, taga Purok 2, Brgy. Lubogan; ug Niel Cabase Cansana, residente sa Purok 8, Pagkakaisa, Brgy. Lubogan, sa Toril Davao City.
Nakatakdang kasohan ang mga nahisgutan og kasong pagsupak sa Presidential Decree No. 705 kun Forestry Reform Code ug Republic Act 460 kun Regulating the Operation of Sawmills, Requirng Operations of Sawmills.